9 кастрычніка пры атрыманні хабару ў асабліва буйным памеры на месцы злачынства быў затрыманы генеральны дырэктар ААТ «МаналітГрад».
Як паведаміла ўпраўленне інфармацыі і грамадскіх сувязяў МУС Беларусі, «спыненне супрацьпраўнай дзейнасці службовай асобы стала вынікам сумесных аператыўна-вышуковых мерапрыемстваў ГУБАЗіК МУС Рэспублікі Беларусь і УБЭЗ ГУУС Мінгарвыканкама».
Супрацоўнікамі ўказаных падраздзяленняў на працягу апошніх трох гадоў праводзілася праверка фактаў злоўжывання службовымі паўнамоцтвамі, вымаганне і атрыманне хабару кіраўніцтвам ААТ «МаналітГрад».
ААТ «МаналітГрад» — будаўнічае прадпрыемства, акцыі якога належаць Міністэрству архітэктуры і будаўніцтва.
Высветлілася, што падазраваны вымагаў у прадстаўніка камерцыйнай арганізацыі 125 млн. рублёў за своечасовасць плацяжоў па выніках выканання субпадрадных работ у доме-новабудоўлі ЖБПК «Маладосць Міншчыны» (пасёлак Юбілейны Мінскага раёна). Падчас атрымання 95 млн. з патрабаванай сумы ён і быў затрыманы.
Дом ЖБПК «Маладосць Міншчыны» ўваходзіць у лік праблемных дамоў і стаіць на кантролі ў рабочай групы, створанай па даручэнні кіраўніка дзяржавы для вывучэння праблемных пытанняў будаўнічай галіны.
ГУБАЗіК МУС сумесна з УБЭЗ ГУУС Мінгарвыканкама задакументаваны аналагічныя факты хабарніцтва сёлета. У прыватнасці, генеральны дырэктар ААТ атрымліваў хабар ад таго ж прадстаўніка камерцыйнай структуры ў сакавіку, ліпені і верасні на агульную суму прыкладна 60 млн. рублёў. Грошы прызначаліся за вырашэнне пытанняў па заключэнні дагавора на будаўнічыя работы на ўказаным аб'екце і безнаяўнай аплаце за нібыта іх выкананне.
Цяпер па гэтых матэрыялах Галоўнае следчае ўпраўленне СК Беларусі распачало крымінальную справу на падставе ч.3 арт. 430 КК (атрыманне хабару ў асабліва буйным памеры асобай, якая займае адказнае становішча). Падазроны затрыманы, з ім праводзяцца неабходныя следчыя дзеянні.
Каментары