Усю адказнасць за апошнія падзеі ва Украіне рэгіяналы ўсклалі на Януковіча і яго найбліжэйшае атачэнне. Пра гэта гаворыцца ў звароце парламенцкай фракцыі Партыі рэгіёнаў да суайчыннікаў, размешчаным на сайце партыі.
Як гаворыцца ў заяве, «мы перажываем адзін з самых складаных і трагічных перыядаў у гісторыі нашай Радзімы. Украіна апынулася ашуканай і абрабаванай, але нават гэта нішто перад горам, з якім сутыкнуліся дзясяткі ўкраінскіх сем'яў, якія страцілі сваіх блізкіх па абодва бакі супрацьстаяння. Украіне здрадзілі, а людзей сутыкнулі лбамі. Уся адказнасць за гэта ляжыць на Януковічу і яго бліжэйшым атачэнні».
«Мы, фракцыя Партыі рэгіёнаў у Вярхоўнай Радзе Украіны і нашы аднапартыйцы, рашуча асуджаем злачынныя загады, якія прывялі да чалавечых ахвяр, да пустой казны, велізарных даўгоў, ганьбы ў вачах украінскага народа і ўсяго свету, у выніку чаго наша краіна апынулася на краі бездані, пагрозы расколу і страты нацыянальнага суверэнітэту. Любыя спробы паўплываць на сітуацыю, пераканаць прэзідэнта не былі пачутыя. Мільённая партыя фактычна апынулася закладнікам адной карумпаванай Сям'і», — гаворыцца ў заяве.
Як адзначаецца, «фракцыя Партыі рэгіёнаў прадстаўляе інтарэсы больш за дзесяці мільёнаў выбаршчыкаў Украіны і больш аднаго мільёна членаў партыі. Партыя рэгіёнаў — гэта нармальныя, працавітыя людзі, якія любяць сваю зямлю, свой народ, гэта прамыслоўцы, навукоўцы, рабочыя, дактары і настаўнікі. Мы прыйшлі ў парламент для таго, каб служыць Украіне і яе народу. Фракцыя Партыі рэгіёнаў заяўляе, што адрозненне ў меркаваннях, часам — адрозненні ў ідэалогіі не з'яўляюцца перашкодай для сумеснай працы на карысць Украіны. Бываюць розныя погляды, але мэта ў нас адна — адзіная, моцная і незалежная Украіна».
«Мы асуджаем ўцёкі і маладушнасць Януковіча. Мы асуджаем здраду. Мы асуджаем злачынныя загады, якія падставілі простых людзей, салдат і афіцэраў. Але спробы татальнага запалохвання і самасуду, дэстабілізацыі сітуацыі ў рэгіёнах не прымальныя ў дэмакратычным грамадстве», — гаворыцца ў заяве.
Звяртаючыся да аднапартыйцаў, фракцыя ПР заяўляе: «Мы зробім усё для таго, каб абараніць вас і абараніць ад тых памылак і злачынстваў, якія былі зробленыя на самым версе. Фракцыя Партыі рэгіёнаў, якая захоўвае ў сваіх шэрагах больш за сто народных дэпутатаў, працягвае працаваць на людзей, якія нам паверылі і на карысць усёй краіны».
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць3939
Каментары