Ярмошына: Колькасць кандыдатаў у прэзідэнты — не паказчык дэмакратыі, а адсутнасць парадку
Колькасць кандыдатаў у прэзідэнты на выбарах 2015 года «будзе залежаць ад таго, як шмат людзей атрымаюць грошы і карт-бланш». Такое меркаванне выказала ў інтэрв`ю БелаПАН старшыня Цэнтрвыбаркама Лідзія Ярмошына.
«Але Цэнтрвыбаркаму лепш, калі іх менш. У нас адзін бухгалтарскі работнік, які займаецца фінансаваннем выбарчых камісій, яму вельмі цяжка дадаткова яшчэ і маніторыць адкрыццё фінансавых рахункаў кандыдатаў, выдаткоўванне на іх сродкаў.
Тым больш што кандыдаты ў прэзідэнты зараз змогуць адкрываць свае фонды з моманту рэгістрацыі ініцыятыўных груп», — сказала кіраўнік ЦВК.
Ярмошына не думае, што на выбарах будзе шмат кандыдатаў у прэзідэнты. «Можа быць, і будуць кандыдаты зусім несур`ёзныя. У нас жа на выбары можа пайсці любы: беспрацоўны, бомж — усе хто заўгодна. Вядома, з`явяцца прэтэндэнты, якія нават подпісы не збіраюць. Ім кандыдацтва трэба толькі для самарэкламы. Але да моманту рэгістрацыі кандыдатаў яны адсеюцца», — лічыць яна.
Паводле меркавання кіраўніка ЦВК, «шмат кандыдатаў — гэта не паказчык дэмакратыі». «Гэта паказчык адсутнасці поўнага парадку.
Хіба шмат кандыдатаў у прэзідэнты ў ЗША? Проста там людзі больш рэальна падыходзяць да сваіх магчымасцяў», — заўважыла Ярмошына.
Прэзідэнцкія выбары павінны прайсці ў Беларусі не пазней за 20 лістапада 2015 года.
Каментары