Выйшаў дакументальны фільм «Рок назаўжды-3» з удзелам Кулінковіча і Міхалка.
Рэжысёр Сяргей Ісакаў і прадзюсэр Юрый Цыбін (аргнанізатар і заснавальнік легендарнай «Рок-каранацыі») працягваюць серыю дакументальных фільмаў «Рок назаўжды». Трэцяя серыя атрымала назву «…ад волі да няволі…» і прысвечана музыкам, чыіх песняў вы не пачуеце на афіцыйных тэле- і радыёканалах.
32-хвілінная стужка складаецца з прамоваў музыкаў і фрагментаў канцэртных запісаў.
Пра што фільм? Адзін з першых беларускіх рокераў Андрэй Плясанаў расказвае як прайшоў шлях ад музыкі да рэжысуры і мастацтва і вярнуўся ў музыку.
Лідар «Нейра Дзюбеля» Аляксандр Кулінковіч адказвае на пытанне, якое шырока абмяркоўвалі ягоныя фаны: чаму галоўны панк краіны стаў калумністам «Советской Белоруссіі»?
Зміцер Вайцюшкевіч расказвае пра сваю сядзібу на хутары Вайцюшкі і тое, чаму лічыць сябе шчаслівым чалавекам.
Сяргей Міхалок разважае пра магчымае вяртанне «Ляпісаў» у Беларусь і задаецца пытаннем: ці гатовая краіна ўспрымаць ягоную музыку па-за палітычным кантэкстам?
Маналог кожнага з музыкаў перабіваецца ўрыўкамі з іх творчасці. Часам музычны матэрыял пачынае «пераважваць» прамову свайго аўтара. З іншага боку, беларуская музыка не можа пахваліцца пільнай увагай кіношнікаў, і любы дакументальны фільм пра яе становіцца падзеяй.
У кадр трапляюць і цікавыя моманты – хутар Вайцюшкевіча, «Ляпісы» па-за сцэнай, каля прыдарожнай кавярні.
У выніку «Рок назаўжды-3» гэта
фільм, прысвечаны «чорным спісам», ён распавядае пра выбар музыкаў: існаваць па-за межамі музыкі альбо па-за межамі краіны.
«Рок назаўжды-3» выйдзе ў фармаце DVD, прэзентацыя стужкі адбудзецца пры канцы красавіка, кажуць аўтары.
Каментары