Казка пра перавыхаваных бізнэсоўцаў: адбыўся закрыты паказ сіквэла «Белых Росаў»
Дрэнны Захад і бяздушны Мінск, несумленныя замежныя інвестары і цынічныя бізнэсмены, якія адарваліся ад каранёў… Фільм «Белыя Росы. Вяртанне» — якраз пра вяртанне тых бізнэсменаў да каранёў.
Поспех першых «Белых Росаў», якія ў 1983 зняў рэжысёр Ігар Дабралюбаў, забяспечылі актуальнасць тэмы — тады якраз ішла ўрбанізацыя, — а таксама зорны склад акцёраў, мяккі гумар і лірызм.
Рэжысёр Аляксандра Бутар вырашыла паўтарыць поспех Дабралюбава. Раней яна здымала на тэлебачанні музычныя кліпы (найперш гурту «Цягні-Штурхай»), навагоднія мюзіклы «Батлейка» і «Паўлінка-new». «Белыя росы. Вяртанне» — яе дэбют у вялікім кіно.
Замежных зорак у новых «Белых Росах» дзве: Карачанцаў і Будрайціс. Мікалай Карачанцаў (Васіль Ходас) з’яўляецца літаральна ў адным эпізодзе.
Акцёр у 2005 трапіў у цяжкую аварыю, атрымаў інваліднасць, гэта яго першы выхад на экран за доўгі час. Славуты літовец Юозас Будрайціс іграе яго брата Андрэя Ходаса (у першым фільме Ходасастарэйшага ўвасобіў Генадзь Гарбук).
Паводле сюжэта, Андрэй вяртаецца з горада ў родную вёску, дзе засталося ўсяго два жыхары: хутаранец Струк (Віктар Манаеў) і нямая жанчына Поля (актрыса Тэатра беларускай арміі Яўгенія Жуковіч). Але ідылічнаму жыццю на ўлонні прыроды перашкаджаюць бізнэсмены Бодзя (Павел Харланчук) і Русачэнка (Сяргей Жбанкоў).
Яны збіраюцца пабудаваць у Белых Росах турыстычны комплекс і дзеля гэтага хочуць адсяліць мясцовых жыхароў.
Грошы бізнэсменам даюць замежныя інвестары. Яны паказаныя бязлітаснымі капіталістамі, якія не разумеюць беларускай душы.
Мінск паўстае дзелавым мегаполісам, дзе ўсе спяшаюцца. Цікава, што паказаны яго навабуды — напрыклад, «дом Чыжа», у якім жыве адзін з бізнэсменаў. Вёска ж у гараджанаў асацыюецца з наіўнасцю і празмернай сумленнасцю.
Ігра акцёраў трохі прыхоўвае агульны сентыменталізм і штучнасць сюжэта. Ходас паўстае задуменным вясковым філосафам. «Калі ўсё будзе знесена, куды прыляціць бусел?» — пытае ён у бізнэсмена Бодзі. Процілегласць Ходаса — легкадумны Струк (для Віктара Манаева гэта першая вялікая роля ў кіно). Атрымаўшы пенсію, Струк купляе на ўсе грошы латарэйныя білеты. Прадаўшы дом Полі, ён марыць набыць яшчэ больш білетаў, а за выйграныя грошы купіць кватэру ў горадзе.
І ўсё гэта — па-расейску. Беларуская мова гучыць толькі ў песні народнага ансамбля, які сустракае самалёт з былой жонкай Андрэя Ходаса. Але пасля кабеты ў народных строях пераходзяць на «обшчапанятную».
Неўзабаве «Белыя Росы. Вяртанне» плануюць паказаць Лукашэнку. А ўжо потым выпусціць на вялікі экран.
Стала вядома, дзе працуе фаварытка Лукашэнкі Уладлена Зайцава19
Каментары