Малая зала к/з «Мінск» (Кастрычніцкая, 5). 19:00.
20 кастрычніка ў 19:00 у малой залі к/з Мінск адбудзецца прэзэнтацыя кнігі «Жыцьцё пасьля раку» і дабрачынны канцэрт гуртоў NAVI, RECHA і RAHIS. Уваход вольны. Кніга выйшла ў сэрыі «Бібліятэка Свабоды».
«Жыцьцё пасьля раку» — гэта 22 гісторыі анкалягічных пацыентаў, якія ўсьвядомілі, што сьмерць можа быць блізка, але іх жыцьцё ў такой сытуацыі набывае іншы сэнс.
Павал Маісееў, загадчык аддзелу арганізацыі супрацьракавай барацьбы Рэспубліканскага цэнтру анкалёгіі і мэдычнай радыялёгіі, быў адным зь першых, хто прачытаў гэтыя гісторыі і напісаў пасьляслоўе да кнігі:
«Яшчэ дзесяць, нават пяць гадоў таму такое проста нельга было ўявіць, каб людзі ў нашай краіне публічна, не хаваючыся, распавядалі пра сваю хваробу, пра «чуму 21 стагодзьдзя — рак».
У Беларусі людзі хаваюць, што яны маюць анкалягічныя хваробы і дыягназ рак успрымаецца многімі як прысуд. Мэтай гэтага праекту было зьмяніць гэты стэрэатып і расказаць пра людзей, якія перамаглі хваробу і лічаць, што гэтае выпрабаваньне зьмяніла і ўдасканаліла іх жыцьцё.
Павал Маісееў адзначае пазытыўны эфэкт ад такіх публікацыяў: «Людзі пачынаюць цікавіцца праблемай ракавых захворваньняў, пазнаюць нешта новае для сябе, кажучы мэдыцынскай мовай, павышаюць сваю «анкалягічную пісьменнасьць». Тут абсалютна дарэчны прынцып: «Хто інфармаваны — той узброены!»
Сярод герояў «Жыцьця пасьля раку» — музыка, банкір, клоўн, палітычны актывіст, тэатральны крытык, настаўніца ангельскай мовы, сьвятар, пэнсіянэр… Гэта людзі розных ўзростаў, інтарэсаў, перакананьняў, сацыяльных статусаў.
Ідэя праекту «Жыцьцё пасьля раку» належыць журналістцы радыё «Свабода» Ганьне Соўсь, яна ж і ўкладальніца кнігі. Паводле яе словаў, у Беларусі 95% людзей хаваюць тое, што яны хварэюць на рак: «У кнізе сабраныя гісторыі 22 чалавек. Гэтыя людзі падзяліліся рэцэптам перамогі над ракам. І гэта толькі пачатак. Бо такіх людзей у Беларусі значна больш».
20 кастрычніка адбудзецца ўрачыстая прэзэнтацыя кнігі з удзелам яе аўтараў і герояў, а таксама беларускіх музыкаў. Гэтая імпрэза распачне кампанію «Перакможам», мэта якой сабраць як можна больш пазытыўных прыкладаў перамогі над гэтай хваробай.
На мерапрыемстве 20 кастрычніка выступяць таксама беларускія гурты NAVI, RECHA i RAHIS. Уваход вольны.
Прэзэнтацыя ў Клічаве:
22 кастрычніка. 14:00. Цэнтр сацыяльнага абслугоўвання насельніцтва, (Савецкая, 3в).
Прэзэнтацыя ў Смаргоні:
25 кастрычніка. 13:00. Канцэртная зала Дзіцячай школы мастацтваў (Кірава, 2).
Каментары