Судом Лідскага раёна вынесены прысуд па справе аб так званым кардшарынгу. У судовай практыцы краіны гэта справа яшчэ не мае прэцэдэнтаў.
Як паведамляе УУС Гродзенскага аблвыканкама, жыхар Ліды, індывідуальны прадпрымальнік, аказваў свае паслугі па падключэнні да спадарожнікавага тэлебачання. Сам ён добра разбіраўся ў тэхналогіях і апрача легальнага падключэння, даволі дарагога, прапаноўваў падключыцца шляхам кардшарынгу.
Сутнасць новай тэхналогіі заключаецца ў наступным: калі раней для несанкцыянаванага прагляду спадарожнікавых тэлеканалаў неабходна было набываць падробленую смарт-карту, то зараз дастаткова падключыць прыёмнік спадарожнікавага вяшчання да інтэрнэту. Спецыяльная праграма, спалучаючыся з серверам, дэкадзіруе тэлевізійны сігнал.
Падчас праведзеных аператыўна-вышуковых мерапрыемстваў сышчыкі аддзела «К» змаглі ўстанавіць больш як сотню кліентаў, якія карысталіся паслугамі злачынцы. Усе яны за 5 у. а. у месяц атрымлівалі прывілеяваны доступ да мноства тэлеканалаў у найвышэйшай якасці.
Дзеянні падазронага былі кваліфікаваныя як несанкцыянаваны доступ да інфармацыі, якая захоўваецца ў камп'ютарных сістэмах ЗАТ «Нацыянальная спадарожнікавая кампанія» і ААТ «НТВ-ПЛЮС», што суправаджаўся парушэннем сістэмы абароны, учынены з карыслівай зацікаўленасці (ч. 2 арт. 349 КК); збыт спецыяльных праграмных сродкаў для атрымання неправамернага доступу да абароненых камп'ютарных сістэм вышэйзгаданых таварыстваў (арт. 353 КК) і заведамае выкарыстанне камп'ютарных праграм, прызначаных для несанкцыянаванага капіравання інфармацыі, якая захоўваецца ў камп'ютарных сістэмах правайдараў спадарожнікавага тэлебачання (ч. 1 арт. 354 КК).
17 сакавіка суд Лідскага раёна ў поўным аб'ёме пагадзіўся з высновамі органаў дазнання і следства ў кваліфікацыі супрацьпраўнай дзейнасці падсуднага і вынес у дачыненні да апошняга абвінаваўчы прысуд, абавязаўшы выплаціць штраф у памеры 200 базавых велічынь. Апрача гэтага, сродкі, заробленыя злачынным спосабам (16,5 млн рублёў і амаль 2000 долараў), павінны быць вернутыя ў даход дзяржавы.
Цяпер чытаюць
Каментары