Адлуп Крамлю ў сацыялягічнай абгортцы
Лічба, пададзеная ўрадавай агенцыяй, у сэнсе дэманстрацыі незалежніцкіх настрояў выглядае нават болей "крутой", чым зьвесткі НІСЭПД. Піша ў сваім блогу Аляксандар Класкоўскі.
Невялічкая нататка БЕЛТА праліла на сочынскія перамовы, бадай, болей сьвятла, чым мэдыйныя падрабязнасьці пра тое, які напой — зялёную гарбату ці какаву — ужывалі Лукашэнка з Мядзьведзевым у Чырвонай Паляне :) Гаворка ідзе пра паведамленьне пад загалоўкам "Бальшыня беларусаў не прымае ўваходжаньне рэспублікі ў склад Расейскай Фэдэрацыі — сацапытаньне".
Найперш кідаецца ў вочы прапагандысцкі аксюмаран: з аднаго боку, рэха савецкага адміністрацыйнага падзелу — рэліктавы тэрмін "рэспубліка" ў дачыненьні да сувэрэннай дзяржавы; зь іншага — незалежніцкі патас у стылістыцы апазыцыйнага мітынгу.
Але галоўнае — сэнсавы акцэнт і час публікацыі.
Па-першае, дасьледаваньне было, хутчэй за ўсё, шматплянавым, і тут выхаплена акурат тая праблема, што зараз смыліць кіроўнай вярхоўцы ("у каго што баліць…").
Па-другое, апытаньне ладзілася Інфармацыйна-аналітычным цэнтрам пры адміністрацыі Лукашэнкі яшчэ ў лістападзе — сьнежні летась, то бок два месяцы таму. НІСЭПД даўно надрукаваў вынікі свайго сьнежаньскага зандажу грамадзскае думкі. Дарэчы, паводле яго, за стварэньне адзінай дзяржавы з Расеяй — 13,1%. На гэтым тле лічба, пададзеная ўрадавай агенцыяй, выглядае нават болей "крутой" у сэнсе дэманстрацыі незалежніцкіх настрояў: толькі 3,4% апытаных выказаліся за ўваходжаньне ў склад РФ.
Ужо былі прэцэдэнты, калі афіцыйныя структуры рабілі набыткам шырокай публікі падобныя лічбы незалежніцкага кшталту. Адбывалася гэта менавіта ў тыя моманты, калі Масква абвастрала пытаньне пра "мух і катлеты".
І гэтым разам (тут цалкам мае рацыю палітоляг Віталь Сіліцкі) у сацыялягічнай абгортцы Менск дае адлуп Крамлю. Калі без залішняй дыпляматыі, то сэнс мэсыджу такі: накінеце аб'яднаўчы рэфэрэндум — атрымаеце дулю з макам.
Што-што, а рэфэрэндумы наша вэртыкаль ладзіць умее!
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»32
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць1010
Каментары