Ад 1 да 17 мая ў Празе і Остраве пройдзе 79-ы чэмпіянат свету па хакеі. Чэхія пераняла эстафету спаборніцтваў у Беларусі.
Год назад у Мінску беларусы паказалі вельмі прыстойны вынік, трапіўшы ў чвэрцьфінал. Маглі прайсці і далей, але шведы аказаліся больш спрактыкаванымі. Галоўнай прычынай такога поспеху беларусаў называецца натхненне ад гульні пры родных трыбунах, а таксама слабыя склады каманд суперніц, якія ў год Алімпіяды даслалі не самых моцных гульцоў.
Сёлета ў Чэхіі будзе цяжэй. Трывогу выклікаюць нават кантрольныя гульні, дзе беларусы цярпелі адну паразу за другой. А ў агульным заліку хакейнага «Еўравыкліку» занялі апошняе месца.
Адмовіліся прыехаць у склад зборнай і многія лідары каманды. Напрыклад, натуралізаваны канадзец Джэф Плат спаслаўся на вяселле. А нядаўнія фіналісты Кубка Гагарына ў складзе казанскага «Ак Барса» Канстанцін Кальцоў і Уладзімір Дзянісаў увогуле не растлумачылі сваю адсутнасць. Без такіх прызнаных майстроў нашым будзе цяжка. Некаторыя эксперты схіляюцца да меркавання, што галоўнай задачай беларусаў будзе не вылецець у ніжэйшы дывізіён.
Наша зборная будзе гуляць у Остраве, на самым усходзе Чэхіі. Сустрэчы будзе прымаць 10-тысячная «ČEZ-Арэна».
Расклад матчаў зборнай Беларусі:
2 мая: Беларусь — Славенія (пачатак у 17:15)
3 мая: Беларусь — Славакія (17:15)
5 мая: Данія — Беларусь (17:15)
7 мая: ЗША — Беларусь (17:15)
9 мая: Беларусь — Расія (13:15)
11 мая: Фінляндыя — Беларусь (17:15)
12 мая: Нарвегія — Беларусь (13:15)/
Цяпер чытаюць
Жалезная заслона ў дзеянні: як зменшылася колькасць перасячэнняў мяжы Беларусі і Еўрасаюза за апошнія гады17
Каментары