93-гадовы стары, які на вачах губляе і памяць, і здольнасць хадзіць, але які не губляе востры розум і ўменне за дэтэктыўнай загадкай убачыць чалавечую гісторыю і драму чалавечых адносін.
Такім паўстае герой новага брытанскага фільма «Містэр Холмс» у выкананні патрыярха брытанскага кіно і тэатра Іэна Макелена, піша Бі-Бі-Сі.
Колькасць фільмаў пра вялікага сышчыка пераваліла за сотню. Першы быў зняты 100 гадоў таму — у 1916 годзе.
Няма недахопу і ў яркіх экранных увасабленнях Холмса. Постсавецкі глядач захоўвае вернасць сапраўды цудоўнаму Васілю Ліванаву. У англа-амерыканскім кіно ў гэтай ролі спрабавалі сябе самыя гучныя зоркі, а хрэстаматыйным і для многіх непераўзыдзеным на радзіме Холмса лічыцца Джэрэмі Брэт. Ён зняўся ў 42 фільмах тэлесерыяла «Прыгоды Шэрлака Холмса» (1982—1994).
У апошняе дзесяцігоддзе для гледачоў маладых Шэрлак Холмс — гэта Роберт Даўні-малодшы і, вядома ж, Бенедыкт Камбербатч, «Шэрлак Холмс XXI стагоддзя».
І вось новы фільм рэжысёра Біла Кондана, дзеянне якога адбываецца ў 1947 годзе (раман Мітча Каліна «Пчолы містэра Холмса), праз 20 гадоў пасля публікацыі апошняй гісторыі пра Ш.Холмса Артурам Конан-Дойлем і 17 гадоў праз пасля смерці самога пісьменніка.
93-гадовы Холмс адпраўляецца на адпачынак у вясковы дом у графстве Сусэкс, дзе ён разводзіць пчол і жыве са сваёй эканомкай і яе дапытлівым падлеткам-сынам.
Гублянне памяці, як непазбежны спадарожнік старасці і старэння — адна з галоўных тэм фільма.
Можа быць, таму гэтак хаатычнымі выглядаюць намаганні Холмса аднавіць у памяці акалічнасці старой справы 1919, і яго паездка ў разбураную вайной (але яшчэ не атамнай бомбай!) Хірасіму.
Менавіта там, у японскай гісторыі крыецца зусім забытая старым Холмсам бегла прамоўленая ім легкадумная фраза, што, як ён цяпер разумее, становіцца прычынай сямейнай трагедыі на другім канцы планеты.
Прыхільнікі традыцыйнага Шэрлака Холмса могуць быць расчараваныя. У фільме «Містэр Холмс» няма не толькі дынамічнага прыгодніцкага дзеяння, але і скрупулёзнай інтэлектуальнай дэдукцыі.
Але ціхая, сумная, амаль меланхалічная карціна патрывожанай згасаючай свядомасці, знятай на фоне пастаральнага англійскага вясковага пейзажу, аказваецца, тым не менш, неверагодна захапляльнай.
Такога Холмса мы яшчэ не бачылі …
Трамп заявіў, што вядзе з Лукашэнкам перамовы пра вызваленне часткі з 1400 палітвязняў9
Каментары