Пячэрскі суд Кіева арыштаваў італьянскую маёмасць Аляксея Азарава, сына былога прэм'ер-міністра Украіны, які ў цяперашні час знаходзіцца ў Расіі.
Паводле паведамлення Генпракуратуры Украіны, гаворка ідзе пра дамы ў горадзе Ольбія (Сардзінія) і рахункі ў банку Santander, якія належаць Аляксею Азараву.
«У цяперашні час рашэнне накіраванае для выканання кампетэнтным органам Італьянскай Рэспублікі ў рамках міжнароднай прававой дапамогі пры правядзенні працэсуальных дзеянняў», — заявілі ў Генпракуратуры.
Ва Украіне Аляксея Азарава падазраюць у незаконным узбагачэнні на суму 7,7 млн еўра, 600 тыс швейцарскіх франкаў і 500 тыс даляраў. Акрамя таго, Азараў доўгі час знаходзіўся ў санкцыйным спісе Еўрасаюза, аднак у сакавіку стала вядома, што ЕС зняў санкцыі з сына былога прэм'ера Украіны.
Раней у панядзелак бацька Аляксея Мікалай Азараў, які знаходзіцца ў міжнародным вышуку, абвясціў на прэс-канферэнцыі ў Маскве аб стварэнні Камітэта выратавання Украіны, які выступае за датэрміновыя выбары ва Украіне. У Камітэце нават выбралі кандыдатуру на ролю прэзідэнта — Уладзіміра Алейніка, які падазраецца ў арганізацыі незаконнага галасавання ў Вярхоўнай Радзе.
Каментары