65-гадовага ўплывовага боса мафіі Віторыа Касамоніка праводзілі ў апошні шлях з незвычайнай пыхай пад мелодыю фільма «Хросны бацька».
Труну з целам нябожчыка мафіёзі даставілі ў царкву Сан Джавані Боска ў прыгарадзе Рыма ў карэце, запрэжанай шасцёркай коней з чорным плюмажам.
Карэту суправаджалі чорныя лімузіны з вянкамі. З верталёта на зямлю ляцелі пялёсткі чырвоных руж. Сотні людзей у слязах прыйшлі развітацца з Касамоніка, які, імаверна, памёр ад раку.
Катафалк з целам Касамоніка даставілі ў царкву, дзе на наведвальнікаў таксама скінулі пялёсткі чырвоных руж.
«Ты здолеў заваяваць Рым, чарга за раем», — абвяшчаў надпіс на адным з плакатаў, якія віселі на браме перад царквой.
«Кароль Рыма» — было напісана на другім плакаце.
Італьянскія палітыкі асудзілі паказное дзейства.
Дэпутаты з левай партыі заклікалі ўлады Італіі высветліць, хто дапусціў правядзенне настолькі пышнага пахавання. «Падобнае зусім недапушчальна ў дэмакратычнай дзяржаве», — гаворыцца ў заяве дэпутатаў.
Палітыкі назвалі пахаванне ў духу галівудскіх фільмаў адкрытай заявай аб беспакаранасці злачынцаў і заклікалі прыняць меры, каб забараніць падобныя мерапрыемствы, якія праслаўляюць крымінальнікаў.
Італьянскія ўлады абвінавачваюць мафіёзны клан Касамоніка ў рэкеце, вымагальніцтве, гандлі наркотыкамі і адмыванні грошай.
Цяпер чытаюць
Андрэй Швед, архітэктар рэпрэсій, прызначаны старшынёй Вярхоўнага суда14
Каментары