Гігіна, Кізіму і Шпакоўскага абвінавацілі ў нянавісці да «рускага свету»
Вядомы расійскі палітолаг і гісторык Алег Няменскі ў сваім блогу рэзка раскрытыкаваў сваіх беларускіх калег за нацыяналізм.
8 кастрычніка пасольства Беларусі ў Расіі зладзіла экспертны відэамост Масква – Мінск на тэму «Перспектывы беларуска-расійскіх адносін у кантэксце прэзідэнцкіх выбараў».
З беларускага боку ў мерапрыемстве прымалі ўдзел галоўны рэдактар часопісу «Беларуская думка» Вадзім Гігін, палітолагі Юрый Шаўцоў, Сяргей Кізіма і Аляксандр Шпакоўскі.
«З беларускага боку ішоў шквал прэтэнзій і наездаў, — піша Алег Няменскі. – Асабліва разышоўся раней нібыта памяркоўна прарускі Гігін, які проста крычаў, перабіваў, абражаў, абураўся. Ніяк не чакаў ад яго такіх паводзінаў».
Няменскі, які лічыцца экспертам у Расіі па Украіне і Беларусі, адзначае, што ўсіх беларускіх экспертаў аб’ядноўвала «нянавісць да Рускага свету».
«Відавочна, што з таго моманту, як Лукашэнка абвясціў яму [рускаму свету – «НН»] вайну, эксперты сталі ў шэрагі.
Асабліва пацешыла ультрарусафобская прамова Кізімы, які вельмі баіцца «русіфікацыі Беларусі»
і нават паставіў умову: калі вы хочаце інтэгравацца з Беларуссю, то павінны адмовіцца ад рускага патрыятызму. Такі вось шантаж: альбо вы сябе забіваеце, альбо мы ад вас адварочваемся. «Што для вас важней: інтэграцыя або ідэалогія?» Самае цікавае, што лукашэнкаўскія эксперты сапраўды думаюць, што могуць ставіць Расеі такія ўмовы», — працягвае Алег Няменскі.
«Факт у тым, што беларусы настроены несупастаўна больш па-прарасейску і па-праруску, чым цяперашняя палітычная і экспертная эліта Беларусі. І калі яна вырашыла аб'явіць вайну Рускаму свету, то беларусы будуць на другім баку. Ну, акрамя недзе 20 працэнтаў», — робіць выснову расійскі эксперт. Ён лічыць, што беларуская эліта не гатовая нават да такой «квазіінтэграцыі» з Расіяй, якая прапаноўваецца цяпер.
Цяпер чытаюць
Як выглядаюць кватэры з сацыяльным рамонтам для чаргавікоў і колькі за іх просяць2
Каментары