Аляксандр Лукашэнка вечарам 14 снежня прыбыў з афіцыйным візітам у Расійскую Федэрацыю. Самалёт з беларускім кіраўніком на борце прызямліўся ў маскоўскім аэрапорце Унукава.
Вось відэа яго сустрэчы ў маскоўскім аэрапорце.
На сайце Крамля паведамляецца, што 15 снежня адбудуцца перамовы Уладзіміра Пуціна і Аляксандра Лукашэнкі «па шырокім спектры актуальных пытанняў расійска-беларускіх адносін і міжнароднага парадку дня».
«Асаблівую ўвагу плануецца надаць далейшаму паглыбленню эканамічнай інтэграцыі на еўразійскай прасторы і мерам па нарошчванні гандлёва-інвестыцыйнага супрацоўніцтва ў межах Саюзнай дзяржавы», — сказана ў паведамленні.
Нагадаем, афіцыйны візіт Лукашэнкі ў Расію планаваўся 25—26 лістапада. У Маскве 26 лістапада павінна была адбыцца яго сустрэча з прэзідэнтам РФ Уладзімірам Пуціным у вузкім складзе, затым — перамовы ў пашыраным фармаце. Паводле вынікаў сустрэчы анансавалася падпісанне міжнародных дакументаў. Лукашэнка таксама планаваў сустрэцца з прэм'ер-міністрам РФ Дзмітрыем Мядзведзевым, са старшынёй Савета Федэрацыі Федэральнага сходу Валянцінай Мацвіенкай і старшынёй Дзярждумы Сяргеем Нарышкіным.
Аднак 24 лістапада было абвешчана, што візіт перанесены, як заявіў прэс-сакратар расійскага прэзідэнта Дзмітрый Пяскоў, «у сувязі з загружанасцю працоўных графікаў прэзідэнтаў Беларусі і Расіі».
Лукашэнка планаваў традыцыйна ажыццявіць свой першы візіт пасля перавыбрання кіраўніком дзяржавы ў Расію, аднак у выніку спачатку адправіўся ў В'етнам, а адтуль — у Туркменістан.
Цяпер чытаюць
Навуковец распавёў пра геалагічныя загадкі Беларусі: іртуць з зямлі і кратар ад падзення метэарыта, які знішчыў усё жывое ў радыусе тысяч кіламетраў66
Каментары