Пра такі выпадак расказала ў сваім фэйсбуку жонка Статкевіча Марына Адамовіч.
«У навагоднюю ноч вырашылі мы з Міколам і Юрасём [сын Марыны – «НН»] пайсці пагуляць у наш парк, да ялінкі. Было каля чатырох ночы… Гляджу, Мікола кладзе ў кішэню мабільнік. Пытаюся, навошта яму ўначы ў парку «маячок». А, кажа, спецыяльна, каб у навагоднюю ноч «гэтыя» не расслабляліся. Пажартаваў…
Хады нам да парка хвілін 7, ну, нага за нагу, можа і 10 цягнуліся. Па дарозе там-сям невялікія кампаніі трапляліся (выключна мірныя). Як кажуць: «Ничто не предвещало». Ужо на ўваходзе ў парк, ля мастка праз ручэй, ад дрэва аддзяліўся і рашуча скіраваўся нам наперарэз бравы, гм-м, прадстаўнік праваахоўных органаў - амапавец, карацей.
Гэты служыцель закона нам ветліва (!) прапанаваў вярнуцца дахаты, бо, цытую: «Вход в парк запрещён. Массовое мероприятие закончено и сейчас будет производиться зачистка территории».
Карацей, сказаў адзінае, што ўмеў сказаць «ветліва», не размахваючы дубінай.
Далейшых «указанняў», акрамя «спыніць і развярнуць», яўна, за кароткім часам, не паступіла і «чысцільшчык» упаў у ступар. На пытанні пра прозвішча, месца службы і нарматыўны дакумент, якім ён кіруецца, адказаць не здолеў. І, падаецца мне, што для такіх, асаблівых выпадкаў (пытанні там ўсялякія задаюць, страшныя словы кшталту «закон» ужываюць) у іх там трывожная кнопачка ўманціравана, бо, ізноў жа, з засады, выехаў на дапамогу аўтамабіль з «ахвіцэрам».
«Ахвіцэр» з трэцяй спробы, усё ж, здолеў прадставіцца, а вось з веданнем закона здарыўся такі ж ступар, як і ў падначаленага. Аказваецца, навагодняя «зачыстка тэрыторыі» праводзіцца на падставе закона аб масавых мерапрыемствах.
Карацей, у парк мы такі прайшлі — сілы былі няроўныя (з нашага ж боку была я!). Зачысткі не назіралася. «Зачысціць» спрабавалі толькі нас, каб не цягацца следам.
А у парку было пустынна і ціха».
Каментары