АГП возьме ўдзел у парламенцкай кампаніі 2016 года з «прынцыповых меркаванняў»
Аб'яднаная грамадзянская партыя (АГП) возьме ўдзел у парламенцкай кампаніі 2016 года з прынцыповых меркаванняў.
«Мы ўдзельнічаем ва ўсіх выбарчых кампаніях, гэта прынцыповая пазіцыя», — заявіў старшыня АГП Анатоль Лябедзька 14 студзеня на прэс-канферэнцыі ў Мінску. «Але мы заўсёды распрацоўваем свой сцэнарый удзелу ў выбарах, мы не гуляем па правілах улады», — дадаў ён.
На думку Лябедзькі, ніякай новай стратэгіі ўдзелу ў выбарчых кампаніях, у тым ліку ў парламенцкіх выбарах 2016 года, прыдумваць не трэба. «Ёсць шмат людзей, якія пазіцыянуюць сябе аналітыкамі. Яны кажуць, што ранейшыя стратэгіі пацярпелі паражэнні, таму трэба шукаць штосьці новае. Нічога новага, галоўнае — паслядоўнасць, прынцыповасць, пераемнасць», — лічыць палітык. АГП, паводле яго слоў, пойдзе на парламенцкія выбары з тым жа пасланнем, што і на прэзідэнцкіх выбарах 2015 года, — з праграмай «Мільён новых працоўных месцаў».
Адной з задач удзелу ў парламенцкай кампаніі Лябедзька назваў недапушчэнне легітымацыі яе вынікаў. «Мы будзем збіраць доказы, што ў Беларусі няма сумленных і свабодных выбараў. Гэта можна зрабіць толькі праз актыўны ўдзел у выбарчай кампаніі», — падкрэсліў ён.
Палітык паведаміў, што АГП склала пералік з 55 прадстаўнікоў партыі, якіх прапаноўвае ўнесці ў адзіны спіс кандыдатаў ад правацэнтрысцкай кааліцыі. Гэты пералік перададзены для ўзгаднення іншым удзельнікам кааліцыі (акрамя АГП у правацэнтрысцкую кааліцыю ўваходзяць рух «За Свабоду» і аргкамітэт па стварэнні партыі «Беларуская хрысціянская дэмакратыя»).
Раней сустаршыня аргкамітэта БХД Віталь Рымашэўскі паведаміў, што ў іх арганізацыі больш за 30 актывістаў, якія ва ўмовах свабодных выбараў здольныя стаць «альтэрнатывай дзейнай уладзе».
У папярэдні спіс кандыдатаў ад руху «За Свабоду» ўключана 36 прэтэндэнтаў, у тым ліку першы намеснік старшыні Юрый Губарэвіч і намеснік старшыні Алесь Лагвінец.
Дакладная дата парламенцкіх выбараў павінна быць вызначаная не пазней за 10 чэрвеня, крайні тэрмін іх правядзення — 11 верасня 2016 года.
«Засяроджуся на працы з ЗША». Ціханоўскі расказаў пра свае палітычныя планы на 2026 год32
Каментары