У кінатэатры “Перамога” – дзьве ігравыя і дзьве дакумэнтальныя стужкі, прадстаўленыя амбасадай Ізраілю.
З 20 па 22 траўня Амбасада Ізраілю і менскі кінапракат прадстаўляюць гледачам “Новае кіно Ізраілю”. У кінатэатры "Перамога" будуць паказаныя дзьве дакумэнтальныя і дзьве ігравыя стужкі.
Драма “Зоркі Шломі” расказвае пра 16-гадовага хлопца, на якім трымаецца дом. Ён дапамагае старому дзядулі, утаймоўвае неўраўнаважаную маці, падбадзёрвае бацьку, дапамагае сястры. Героя лічаць ня вельмі разумным, бо ён кепска вучыцца. Але аднойчы высьвятляецца, што ў Шломі – незвычайныя матэматычныя таленты.
У 2003 годзе карціна Шэмі Зархіна атрымала прызы Ізраільскай кінаакадэміі за найлепшыя акторскія працы, дызайн касьцюмаў і апэратарскае майстэрства.
У дакумэнтальным фільме Іда Ара “Растапіць Сібір” гераіня едзе зь Ізраілю ў Сібір – да бацькі, якога яна амаль ня ведае. Яна сустракаецца са сваякамі і знаходзіць тую частку свайго жыцьця, якая неабходна ёй для сапраўднай гармоніі.
Стужка “Нумар сямнаццаць” – дакумэнтальны вышук. У 2002 годзе рэйсавы аўтобус быў растраляны. 16 загіблых пасажыраў было апазнана, сямнаццаты застаўся невядомым. Рэжысэр Давід Офэк ідзе па сьледу…
Сьляпая гераіня ігравой карціны “Па-за полем зроку” таксама вядзе вышук. Яна вяртаецца дадому, каб даведацца, чаму зрабіла сабе сьмерць стрыечная сястра. Раскрываюцца нечаканыя сямейныя тайны – і гераіня змагаецца ня толькі зь фізычнай, але й духовай сьлепатой. Фільм названы “захапляльным псыхалягічным і нават псыхіятрычным дэтэктывам”. У 2005 годзе стужка атрымала прызы Ізраільскай кінаакадэміі за найлепшую рэжысуру (Дэні Сіркін) – і прыз глядацкіх сымпатый на фэсьце ізраільскага кіно ў Нью-Ёрку.
Расклад сэансаў:
20 траўня а 19.00 – “Зоркі Шломі”, 2003, 94 хв.
21 траўня а 19.00 “Вечар дакумэнтальнага кіно” – “Нумар сямнаццаць”, 2003, 76 хв.; і “Растапіць Сібір”, 2004, 75 хв.
22 траўня а 19.00 – “Па-за полем зроку”, 2005, 86 хв.
Даведкі кінатэатра "Перамога": 203-77-66
Цяпер чытаюць
Анатоль Котаў ужо выязджаў у Турцыю і лічыў яе бяспечнай — крыніцы10
Каментары