Мілінкевіч і Севярынец зь візытам у Брусэлі, а лідэры АДС – у Варшаве
Аляксандар Мілінкевіч і Павал Севярынец сёньня ў Брусэлі сустрэнуцца з старшынём Эўрапарлямэнту Гансам-Гертам Пётэрынгам. А дэлегацыя АДС знаходзіцца з чатырохдзённым візытам у Варшаве, дзе правядзе шэраг перамоваў з польскімі ўрадоўцамі.
Лідэр Руху «За свабоду» Аляксандар Мілінкевіч і старшыня аргкамітэту па стварэньні Беларускай хрысьціянскай дэмакратыі Павал Севярынец сёньня ў Брусэлі сустрэнуцца з старшынём Эўрапейскага парлямэнту Гансам-Гертам Пётэрынгам.
Афіцыйна паведамляецца, што сустрэча зьвязаная зь перадачай беларускімі палітыкамі ў Эўрапарлямэнт 50 тысячаў подпісаў незадаволеных Законам «Аб свабодзе сумленьня і рэлігійных арганізацый». Раней гэтыя подпісы былі перададзеныя ў Адміністрацыю прэзыдэнта, Канстытуцыйны суд і палату прадстаўнікоў.
Вядома, што размова між беларускімі палітыкамі і Гансам-Гертам Пётэрынгам пойдзе ня толькі пра ўціск правоў вернікаў у нашай краіне. Аднак астатнія аспэкты гутаркі з эўрачыноўнікам, пакуль не афішуецца.
У сваю чаргу дэлегацыя Аб’яднаных дэмакратычных сілаў знаходзіцца з чатырохдзённым візытам у Варшаве. У сталіцу Польшчы накіраваліся старшыня БНФ Лявон Баршчэўскі, невыязны лідэр АГП Анатоль Лябедзька (пакуль невядома, як ён дабраўся ў Варшаву), выконваючы абавязкі старшыні БСДП Анатоль Ляўковіч, лідэр ПКБ Сяргей Калякін, а таксама адзін з кіраўнікоў Руху «За свабоду» Віктар Карніенка.
Плянуецца, што цягам візыту палітыкі сустрэнуцца зь міністрам замежных справаў Польшчы Радаславам Сікорскім і ягоным намесьнікам Анджэем Крэмерам. Таксама будуць сустрэчы ў канцылярыі прэм’ер-міністра Дональда Туска, міністэрстве культуры, Сэнаце і Сойме Польшчы.
У аўторак з раніцы ўжо адбылася адна з заплянаваных сустрэч. У Варшаўскім унівэрсытэце палітыкі мелі размову з кіраўніком стыпэндыяльнай праграмы імя Кастуся Каліноўскага доктарам Янам Маліцкім. «Мы прасілі польскі бок па магчымасьці дапамагаць нашым юнакам і дзяўчатам лепш акліматызавацца ў чужой краіне», – кажа В. Карніенка.
Цікава, што візыт беларускіх палітыкаў у Варшаву арганізавала польскае МЗС. Але гэты момант не афішуецца. Гэта характэрна для манеры вядзеньня замежнай палітыкі Тускам-Сікорскім. Урад Качынскага дзейнічаў дэманстратыўна, а ўрад лібэралаў імкнецца не дражніць гусей.
Скончыцца візыт 30 траўня.
Цяпер чытаюць
У Судане паўстанцы збілі самалёт з беларускім вайсковым лётчыкам. Вось што пра яго вядома8
Каментары