На маладафронтаўцаў напалі з-за «Пагоні» на «Экспабеле». На рынку паабяцалі разабрацца ў сітуацыі
19 ліпеня актывісты «Маладога фронту» правялі акцыю на рынку «Экспабел». Нагодай для яе стаў канфлікт, які адбыўся там у мінулую суботу. Тады паміж мясцовымі прадпрымальнікамі і маладафронтаўцамі адбылася бойка.
16 ліпеня актывісты спартыўна-патрыятычнага клуба «Ваяр» пры «Маладым фронце» арганізавалі талаку ў Курапатах, дзе даводзілі да ладу мемарыял пасля стыхіі, якая разгулялася напярэдадні.
— Мы адправіліся на рынак падтачыць пілу, і, пакуль чакалі, да нас падышло чалавек сем і са словамі «Мы за расейскіх — гэта наша зямля» пачалі ўжываць сілу, біць па тварах, — распавёў адзін з удзельнікаў суботніх падзей Сяргей Стрыбульскі. — Ім не спадабаліся герб «Пагоня» і бел-чырвона-белы сцяг.
Паводле яго слоў, маладафронтаўцы ў адказ сілу не ўжывалі, а толькі блакавалі ўдары і адразу выклікалі міліцыю. Супрацоўнік міліцыі сапраўды прыехаў, аднак да ўдзельнікаў канфлікту, па словах Стрыбульскага, не падыходзіў.
Актывісты «Маладога фронту» прыязджалі на «Экспабел» у нядзелю, каб абмеркаваць тое, што здарылася з удзельнікамі канфлікту і адміністрацыяй рынку, але нікога з завадатараў на месцы не было. Таму сёння актывісты прыехалі паўторна. Іх было каля 10 чалавек.
Відэа з сустрэчы на «Экспабеле» ў аўторак, 19 ліпеня:
Аднак асноўнага завадатая бойкі — Аляксандра Філімонава — не аказалася на месцы і сёння.
Удзельнік канфлікту з боку прадпрымальнікаў, які назваўся Яўгенам, сваю пазіцыю патлумачыў так:
— Я ўбачыў людзей з «Пагоняй», мне іх пазіцыя не спадабалася, я вырашыў ім зрабіць заўвагу.
Сам факт канфлікту ён не адмаўляў, але пра бойку нічога не сказаў.
Старшы адміністратар «Экспобела» Павал Астаповіч прыняў у актывістаў МФ зварот да адміністрацыі рынку і паабяцаў адказаць на яго ў вызначаныя тэрміны. Маладафронтаўцы заявілі, што таксама дашлюць зварот у Мінгандлю і пракуратуру.
Астаповіч паведаміў, што завадатар канфлікту Аляксандр Філімонаў не з'яўляецца арандатарам рынку, а толькі пастаўляе тавар. «З любым арандатарам, які будзе правакаваць падобныя канфліктныя сітуацыі, адміністрацыя рынку будзе разбірацца, таму што гэта не ў нашых інтарэсах. Я абяцаю правесці ўнутраную праверку таго, што здарылася», — запэўніў Павел Астаповіч.
Акрамя таго, ён паабяцаў пагутарыць з іншымі прадаўцамі, высветліць імёны ўсіх удзельнікаў канфлікту і ўжыць меры.
— Любы чалавек мае права выказваць свае палітычныя погляды, і за гэта права яму нічога не павінна быць, — заявіў прадстаўнік адміністрацыі «Экспабела».
Кіраўнік «Маладога фронту» Зміцер Дашкевіч сённяшняй сустрэчай застаўся задаволены.
— Гэтыя людзі паказалі сваю «смеласць»: збаяліся і не прыйшлі. Гэтая сітуацыя абсалютна непрымальная. Людзі не лезлі да супрацоўнікаў рынку з агітацыяй, не лезлі ў слоўныя сваркі, проста ішлі міма, а на іх напалі, як у 90-я, — пракаментаваў ён суботні канфлікт.
Каментары