Na maładafrontaŭcaŭ napali z-za «Pahoni» na «Ekspabiele». Na rynku paabiacali razabracca ŭ situacyi

16 lipienia aktyvisty spartyŭna-patryjatyčnaha kłuba «Vajar» pry «Maładym froncie» arhanizavali tałaku ŭ Kurapatach, dzie davodzili da ładu miemaryjał paśla stychii, jakaja razhulałasia napiaredadni.

Pavialičyć

— My adpravilisia na rynak padtačyć piłu, i, pakul čakali, da nas padyšło čałaviek siem i sa słovami «My za rasiejskich — heta naša ziamla» pačali ŭžyvać siłu, bić pa tvarach, — raspavioŭ adzin z udzielnikaŭ subotnich padziej Siarhiej Strybulski. — Im nie spadabalisia hierb «Pahonia» i bieł-čyrvona-bieły ściah.

Pavodle jaho słoŭ, maładafrontaŭcy ŭ adkaz siłu nie ŭžyvali, a tolki błakavali ŭdary i adrazu vyklikali milicyju. Supracoŭnik milicyi sapraŭdy pryjechaŭ, adnak da ŭdzielnikaŭ kanfliktu, pa słovach Strybulskaha, nie padychodziŭ.

Aktyvisty «Maładoha frontu» pryjazdžali na «Ekspabieł» u niadzielu, kab abmierkavać toje, što zdaryłasia z udzielnikami kanfliktu i administracyjaj rynku, ale nikoha z zavadataraŭ na miescy nie było. Tamu siońnia aktyvisty pryjechali paŭtorna. Ich było kala 10 čałaviek.

Videa z sustrečy na «Ekspabiele» ŭ aŭtorak, 19 lipienia:

Adnak asnoŭnaha zavadataja bojki — Alaksandra Filimonava — nie akazałasia na miescy i siońnia.

Pavialičyć

Udzielnik kanfliktu z boku pradprymalnikaŭ, jaki nazvaŭsia Jaŭhienam, svaju pazicyju patłumačyŭ tak:

— Ja ŭbačyŭ ludziej z «Pahoniaj», mnie ich pazicyja nie spadabałasia, ja vyrašyŭ im zrabić zaŭvahu.

Sam fakt kanfliktu jon nie admaŭlaŭ, ale pra bojku ničoha nie skazaŭ.

Pavialičyć

Staršy administratar «Ekspobieła» Pavał Astapovič pryniaŭ u aktyvistaŭ MF zvarot da administracyi rynku i paabiacaŭ adkazać na jaho ŭ vyznačanyja terminy. Maładafrontaŭcy zajavili, što taksama dašluć zvarot u Minhandlu i prakuraturu.

Astapovič paviedamiŭ, što zavadatar kanfliktu Alaksandr Filimonaŭ nie źjaŭlajecca arandataram rynku, a tolki pastaŭlaje tavar. «Ź lubym arandataram, jaki budzie pravakavać padobnyja kanfliktnyja situacyi, administracyja rynku budzie raźbiracca, tamu što heta nie ŭ našych intaresach. Ja abiacaju pravieści ŭnutranuju pravierku taho, što zdaryłasia», — zapeŭniŭ Pavieł Astapovič.

Pavialičyć

Akramia taho, jon paabiacaŭ pahutaryć ź inšymi pradaŭcami, vyśvietlić imiony ŭsich udzielnikaŭ kanfliktu i ŭžyć miery.

— Luby čałaviek maje prava vykazvać svaje palityčnyja pohlady, i za heta prava jamu ničoha nie pavinna być, — zajaviŭ pradstaŭnik administracyi «Ekspabieła».

Kiraŭnik «Maładoha frontu» Źmicier Daškievič siońniašniaj sustrečaj zastaŭsia zadavoleny.

— Hetyja ludzi pakazali svaju «śmiełaść»: zbajalisia i nie pryjšli. Hetaja situacyja absalutna nieprymalnaja. Ludzi nie leźli da supracoŭnikaŭ rynku z ahitacyjaj, nie leźli ŭ słoŭnyja svarki, prosta išli mima, a na ich napali, jak u 90-ja, — prakamientavaŭ jon subotni kanflikt.

• 0
• 0
• 0
• 0
• 0
• 0
• 1
• 0