Суд вырашыў не караць жанчын, што паскардзіліся на мышэй у рагачоўскім малацэ
Суд Рагачоўскага раёна адмовіў малочнакансерваваму камбінату ў пазове супраць мясцовых жыхарак, якія сцвярджалі, што знайшлі ў малацэ, выпушчаным прадпрыемствам, дохлых мышэй. Падрабязнасці паведаміла прэс-сакратар Гомельскага абласнога суда Вольга Барсукова.
«Мышыны скандал», нагадаем, разгарэўся ў Рагачове яшчэ ў красавіку. Мясцовая жыхарка Аліна набыла ў краме пачак малака для сваёй маці вытворчасці Рагачоўскага МКК (зробленага на філіяле завода ў Жлобіне). Нібыта на наступны дзень перапалоханая маці прыбегла да дачкі на рынак з гэтым малаком: з адрэзанага краю пакета тырчэла галава і лапкі маленькай мышкі.
У гэты ж дзень калега Аліны размясціла ў сацыяльнай сетцы «Аднакласнікі» фатаграфію пачкі малака з галавой жывёліны і надпісам: «Рагачоўскае малако: купі пакет малака і мыш у падарунак».
Публікацыя выклікала вялікі рэзананс. У адказ на Рагачоўскім МКК па абарону сваёй рэпутацыі звярнуліся ў суд.
На МКК правялі ўласнае расследаванне і аб'явілі, што такое надзвычайнае здарэнне на заводзе выключана, бо «канструктыўныя характарыстыкі вузлоў дазавання і напаўнення пакета прадуктам выключаюць трапленне іншародных прадметаў больш за 3 мм».
Акрамя таго, у рэдакцыю TUT.BY адміністрацыя прадпрыемства выслала пратакол патолагаанатамічнага ўскрыцця мышэй і заключэнне прадпрыемства, якое абслугоўвае абсталяванне. Гэтыя дакументы пацвярджаюць, што самастойна мышы не маглі патрапіць у абсталяванне і апынуліся там ужо здохлымі.
У судзе завод патрабаваў спагнаць з трох жанчын маральную шкоду ў памеры 60 тысяч дэнамінаваных рублёў (600 млн недэнамінаваных) і надрукаваць у СМІ абвяржэнне інфармацыі аб трох пацуках у малацэ, якую распаўсюдзілі гараджанкі. Сёння суд Рагачоўскага раёна адмовіў у гэтым прадпрыемству.
Каментары