Sud vyrašyŭ nie karać žančyn, što paskardzilisia na myšej u rahačoŭskim małace
Sud Rahačoŭskaha rajona admoviŭ małočnakansiervavamu kambinatu ŭ pazovie suprać miascovych žycharak, jakija śćviardžali, što znajšli ŭ małace, vypuščanym pradpryjemstvam, dochłych myšej. Padrabiaznaści paviedamiła pres-sakratar Homielskaha abłasnoha suda Volha Barsukova.
«Myšyny skandał», nahadajem, razhareŭsia ŭ Rahačovie jašče ŭ krasaviku. Miascovaja žycharka Alina nabyła ŭ kramie pačak małaka dla svajoj maci vytvorčaści Rahačoŭskaha MKK (zroblenaha na filijale zavoda ŭ Žłobinie). Nibyta na nastupny dzień pierapałochanaja maci prybiehła da dački na rynak z hetym małakom: z adrezanaha kraju pakieta tyrčeła hałava i łapki maleńkaj myški.
U hety ž dzień kaleha Aliny raźmiaściła ŭ sacyjalnaj sietcy «Adnakłaśniki» fatahrafiju pački małaka z hałavoj žyvioliny i nadpisam: «Rahačoŭskaje małako: kupi pakiet małaka i myš u padarunak».
Publikacyja vyklikała vialiki rezanans. U adkaz na Rahačoŭskim MKK pa abaronu svajoj reputacyi źviarnulisia ŭ sud.
Na MKK praviali ŭłasnaje rasśledavańnie i abjavili, što takoje nadzvyčajnaje zdareńnie na zavodzie vyklučana, bo «kanstruktyŭnyja charaktarystyki vuzłoŭ dazavańnia i napaŭnieńnia pakieta praduktam vyklučajuć trapleńnie inšarodnych pradmietaŭ bolš za 3 mm».
Akramia taho, u redakcyju TUT.BY administracyja pradpryjemstva vysłała pratakoł patołahaanatamičnaha ŭskryćcia myšej i zaklučeńnie pradpryjemstva, jakoje absłuhoŭvaje abstalavańnie. Hetyja dakumienty paćviardžajuć, što samastojna myšy nie mahli patrapić u abstalavańnie i apynulisia tam užo zdochłymi.
U sudzie zavod patrabavaŭ spahnać z troch žančyn maralnuju škodu ŭ pamiery 60 tysiač denaminavanych rubloŭ (600 młn niedenaminavanych) i nadrukavać u ŚMI abviaržeńnie infarmacyi ab troch pacukach u małace, jakuju raspaŭsiudzili haradžanki. Siońnia sud Rahačoŭskaha rajona admoviŭ u hetym pradpryjemstvu.
Kamientary