У Віцебску прыбралі агароджу на месцы планаванага будаўніцтва Сафійскага сабора ФОТА
У парку Партызанскай славы ў Віцебску, дзе праваслаўная епархія збіралася ўзводзіць копію полацкага Сафійскага сабора, дэмантавалі агароджу вакол будпляцоўкі.
Фота з віцебскага парку апублікаваў TUT.BY.
Дэмантаж адбываўся цягам двух дзён: у чацвер пачалі, а ў пятніцу прыбралі каркас і апоры.
Ідэя архіепіскапа Віцебскага і Аршанскага Дзімітрыя пабудаваць у Віцебску копію полацкага Сафійскага сабора па ўзоры XI ст. выклікала неадназначную рэакцыю сярод гараджан. Паводле праекту, на тэрыторыі, адведзенай пад будаўніцтва храма і размяшчэнне аўтастаянкі, хацелі спілаваць 206 дрэў.
Супрацьстаянне грамадскасці і арганізатараў будаўніцтва сабора працягвалася са студзеня 2015 года. Людзі таксама адзначалі, што ў гэтым раёне горада і так стаяць тры праваслаўныя храмы, пры гэтым у Віцебску хапае даўгабудаў.
Жыхары горада пісалі зварот да Аляксандра Лукашэнкі, а таксама петыцыю да мітрапаліта Паўла. Праціўнікі будаўніцтва збіраліся восенню кожны панядзелак у парку, каб каардынаваць свае далейшыя дзеянні і сачыць, ці не пачалася будоўля.
На месцы плануемага будаўніцтва пабываў старшыня аблвыканкама Мікалай Шарстнёў. У выніку гарвыканкам прыпыніў працы на аб'екце і рэкамендаваў епархіі адкарэктаваць праект будаўніцтва. У прыватнасці, епархіі прапанавалі паменшыць плошчу ніжняга храма да плошчы верхняга, адмовіцца ад аўтастаянак, перанесці забудову бліжэй да Дзвіны і г.д. Гэта дазволіць звесці колькасць высякаць дрэвы да мінімуму.
Старшыня Віцебскага аблвыканкама: На будаўніцтва Сафійскага сабора няма грошай
Цяпер чытаюць
Жалезная заслона ў дзеянні: як зменшылася колькасць перасячэнняў мяжы Беларусі і Еўрасаюза за апошнія гады23
Каментары