Літоўскую Дзяржаўную прэмію прысудзілі даследчыку балцкага светапогляду
На ўручэнне яму прэстыжнай літоўскай Дзяржаўнай прэміі Дайнюс Разаўскас начапіў значак з «Пагоняй», які прывёз з Беларусі.
У Нацыянальным музеі Літвы этнолагу, міфолагу, пісьменніку і перакладчыку Дайнюсу Разаўскасу ўручылі літоўскую Дзяржаўную прэмію імя Ёнаса Басанавічуса — з фармулёўкай «за значныя даследаванні і папулярызацыю светапогляду балтаў».
Прэмію ўручаў міністр культуры Літвы, вітальныя прамовы агучылі іншыя высокія чыноўнікі ад культуры: дырэктар Інстытута літаратуры і фальклора Літвы і дырэктар Цэнтра нацыянальнай культуры Літвы.
Дайнюс Разаўскас — прызнаны навуковец, адзін з рэдактараў літоўскага часопіса пра традыцыйную культуру «Liaudies kultūra» («Народная культура»). Але разам з тым і практык, бо пастаянны ўдзельнік і лектар літоўскай паганскай супольнасці «Рамува».
Разаўскас — наступнік знакамітага літоўскага рэлігіязнаўца Гінтараса Бераснявічуса. Дысертацыю пісаў пад навуковым кіраўніцтвам Уладзіміра Тапарова. Аўтар больш чым 80 навуковых артыкулаў і 7 кніг, сярод якіх — кніжка, прысвечаная міфалагічным сувязям (індаеўрапейскім і балцкім) герба «Пагоня».
Цікава, што на ўрачыстасць з нагоды ўручэння прэміі за даследаванні балцкага светапогляду Разаўскас на лацкан пінжака начапіў значак з гербам «Пагоня», прывезены з адной з паездак у Беларусь. Наша краіна — як зямля, дзе раней жыхары размаўлялі па-балцку, а цяпер жывуць прамыя нашчадкі тых балцкамоўных, — не першы год цікавіць літоўскага даследчыка балцкай культуры.
Адна з загадак, якая рупіць Разаўскасу як навукоўцу, — тое, як у Беларусі калісьці адбыўся пераход з балцкай мовы на славянскую мову. Даследчык прытрымліваецца меркавання, што мова тут змянілася, а насельніцтва засталося ранейшым.
Цяпер чытаюць
Адвакат Дзмітрый Лепрэтар расказаў пра белыя плямы ў справе аб тэракце ў метро7
Каментары