Litoŭskuju Dziaržaŭnuju premiju prysudzili daśledčyku bałckaha śvietapohladu
Na ŭručeńnie jamu prestyžnaj litoŭskaj Dziaržaŭnaj premii Dajnius Razaŭskas načapiŭ značak z «Pahoniaj», jaki pryvioz ź Biełarusi.
U Nacyjanalnym muziei Litvy etnołahu, mifołahu, piśmieńniku i pierakładčyku Dajniusu Razaŭskasu ŭručyli litoŭskuju Dziaržaŭnuju premiju imia Jonasa Basanavičusa — z farmuloŭkaj «za značnyja daśledavańni i papularyzacyju śvietapohladu bałtaŭ».
Premiju ŭručaŭ ministr kultury Litvy, vitalnyja pramovy ahučyli inšyja vysokija čynoŭniki ad kultury: dyrektar Instytuta litaratury i falkłora Litvy i dyrektar Centra nacyjanalnaj kultury Litvy.
Dajnius Razaŭskas — pryznany navukoviec, adzin z redaktaraŭ litoŭskaha časopisa pra tradycyjnuju kulturu «Liaudies kultūra» («Narodnaja kultura»). Ale razam z tym i praktyk, bo pastajanny ŭdzielnik i lektar litoŭskaj pahanskaj supolnaści «Ramuva».
Razaŭskas — nastupnik znakamitaha litoŭskaha relihijaznaŭca Hintarasa Bieraśniavičusa. Dysiertacyju pisaŭ pad navukovym kiraŭnictvam Uładzimira Taparova. Aŭtar bolš čym 80 navukovych artykułaŭ i 7 knih, siarod jakich — knižka, pryśviečanaja mifałahičnym suviaziam (indajeŭrapiejskim i bałckim) hierba «Pahonia».
Cikava, što na ŭračystaść z nahody ŭručeńnia premii za daśledavańni bałckaha śvietapohladu Razaŭskas na łackan pinžaka načapiŭ značak z hierbam «Pahonia», pryviezieny z adnoj z pajezdak u Biełaruś. Naša kraina — jak ziamla, dzie raniej žychary razmaŭlali pa-bałcku, a ciapier žyvuć pramyja naščadki tych bałckamoŭnych, — nie pieršy hod cikavić litoŭskaha daśledčyka bałckaj kultury.
Adna z zahadak, jakaja rupić Razaŭskasu jak navukoŭcu, — toje, jak u Biełarusi kaliści adbyŭsia pierachod z bałckaj movy na słavianskuju movu. Daśledčyk prytrymlivajecca mierkavańnia, što mova tut źmianiłasia, a nasielnictva zastałosia raniejšym.
Kamientary