Новым каардынатарам дзейнасці спецслужбаў ЗША стане 73-гадовы Дэн Коутс. Ён вядомы як прыхільнік жорсткай лініі ў дачыненні да Расіі і выступаў за ўвядзенне санкцый супраць Масквы, паведамляе DW.
Абраны прэзідэнт ЗША Дональд Трамп вылучыў на пасаду кіраўніка нацыянальнай выведкі ЗША экс-сенатара ад штата Індыяна Дэніэла Рэя (Дэна) Коутс. Пра гэта паведаміў у суботу, 7 студзеня, штаб Трампа.
На пасадзе дырэктара нацыянальнай выведкі пасля яго зацвярджэння Сенатам 73-гадовы Коутс зменіць Джэймса Клэпера. У яго задачу ўваходзіць каардынацыя дзейнасці 16-ці спецслужбаў ЗША, якія займаюцца зборам інфармацыі і вядзеннем дзейнасці выведкі. Дырэктар не можа напрамую ўмешвацца ў працу спецслужбаў, яго задачай з'яўляецца абагульненне інфармацыі, што паступае.
Коутс правёў агулам 15 гадоў на пасадзе сенатара, ён прадстаўляў Індыяну ад Рэспубліканскай партыі ў 1989-1999 і 2011-2017 гадах. У апошнія гады ён уваходзіў у сенацкі камітэт па выведцы. У 2001-2005 гадах Коутс займаў пасаду амбасадара ЗША ў Германіі.
Агенцтва называюць яго «ўмераным» ці «традыцыйным» кансерватарам. Коутс быў прыхільнікам увядзення санкцый у дачыненні да Расіі ў 2014 годзе. У сакавіку таго ж года ён быў унесены ў спіс асобаў, якім забаронены ўезд у РФ.
Каментары