Барбара і Дуглас Фінк з канадскага Эдмантана выйгралі трэцюю латарэю за час сумеснага жыцця. Цяперашні выйгрыш стаў для пары самым буйным і склаў 8,2 млн канадскіх даляраў (6,1 млн даляраў ЗША).
Да гэтага ім удавалася выйграць 128 тысяч канадскіх даляраў у 1989 годзе — тады яны падзялілі суму з чатырма сябрамі — і яшчэ 100 тысяч у 2010 годзе.
Паводле прэс-рэлізу Заходнеканадскай латарэі, сума, якая ў выніку дасталася ім цяпер, была найбуйнейшым джэкпотам, калі-небудзь разыграным кампаніяй. Акрамя Фінкаў толькі адзін пакупнік латарэйнага білета адгадаў усе шэсць лічбаў дакладна.
Муж і жонка ўжо вызначыліся, як выдаткаваць грошы. «Сям'я перш за ўсё: хочам, каб дочкам і ўнукам усяго хапала», — сказала арганізатарам латарэі Барбара Фінк.
Яе муж Дуглас дадаў, што таксама яны маюць намер павандраваць і набыць новае жыллё: «Барбара хоча новы дом, і яна яго атрымае», — выказаў упэўненасць мужчына.
Як успамінае Барбара Фінк, яна даведалася пра выйгрыш, калі муж працаваў за горадам, у сувязі з чым не адказаў адразу на яе настойлівы званок па мабільным. Аднак праз пяць хвілін ёй удалося датэлефанавацца да мужа. «Ён зняў слухаўку, і я пракрычала, што зрабіла гэта зноў», — сказала яна.
Каментары