Бізнэс па пастаўцы наркотыкаў з Масквы ў Беларусь спрабаваў наладзіць 28-гадовы беспрацоўны жыхар Гродна.
Праз інтэрнэт мужчына замаўляў партыю ў Маскве, пасля ехаў да мяжы з Расіяй, дзе чакаў паведамлення з каардынатамі тайніка.
Затым гарадзенец ехаў у Маскву і забіраў тавар.
Яшчэ да вяртання ў Беларусь ён ужо звязваўся са сваім будучым пакупніком, дамаўляўся пра схованку, атрымліваў грашовы перавод і адвозіў наркотык у патрэбнае месца.
«На ўсё гэта ў мужчыны сыходзіла крыху больш за суткі, таму ён быў упэўнены, што яго не змогуць вылічыць», — адзначылі міліцыянты.
У ходзе аператыўна-вышуковых мерапрыемстваў міліцыянты даведаліся прыкладныя час і месца вяртання мужчыны ў Беларусь. Ён быў затрыманы ў Барысаўскім раёне, на паўдарозе да месца будучай закладкі.
У тайніку, абсталяваным у багажніку аўтамабіля, было выяўлена больш за 300 г гашышу і 205 таблетак асабліва небяспечнага псіхатропнага рэчыва MDPV.
Тавар прызначаўся 30-гадоваму жыхару Мінска, які займаўся рознічным продажам наркотыкаў. У 17 схованках, зробленых мінчуком раней, канфіскавана каля 460 г асабліва небяспечнага псіхатропнага рэчыва альфа-PVP.
Цяпер мужчыны затрыманыя, абодвум пагражае да 13 гадоў пазбаўлення волі.
Каментары