У Мінскім заапарку выбралі сімвал наступнага года, які паводле ўсходняга гараскопу з'яўляецца годам Вогненнага Каня, паведамляе агенцтва «Мінск-Навіны».
Выбар правялі праз галасаванне ў сацсетках. Усе ахвотныя маглі прагаласаваць за аднаго з васьмі прадстаўленых коней з розным характарам і знешнасцю.
Перамогу атрымала шасцігадовая кабыла Зара. Яна гнядая, сумесь беларускай запражной і латвійскай цеплакроўнай пароды.
У заапарк Зара прыйшла ў 2020 годзе, і супрацоўнікі прызнаюцца, што гэта была любоў з першага погляду. Зара вельмі прывязаная да чалавека: ходзіць за заатэхнікам хвастом, разумее інтанацыі, спакойная і добразычлівая, працуе з дзецьмі і катае маладых коннікаў вельмі асцярожна.
Другое месца ў галасаванні заняла Смолка — дзесяцігадовая цёмна-шэрая кабыла-поні, якая нарадзілася ў заапарку і з’яўляецца ўлюбёнкай дзяцей.
Трэцяе месца — Піён, спакойны і дружалюбны конік поні-класа, якога прывезлі ў заапарк ужо дарослым.
Акрамя гэтага, сярод кандыдатаў былі і іншыя цікавыя коні, напрыклад, Орлік, які сам прыходзіць на працу ў запрэжцы, і Мелодыя, вараная кабыла са складаным, але цікавым характарам.
Заатэхнік заапарку Алена Якушэвіч адзначае, што цалкам падтрымлівае выбар падпісчыкаў: Зара — яе ўлюбёны конь, і выбар сімвала года, на яе думку, справядлівы.
Усяго ў Мінскім заапарку цяпер жывуць дзесяць коней, пяць поні і тры вослікі.
Цяпер чытаюць
Беларусы сустракаюць вызваленых палітвязняў у Вільні ФОТЫ і ВІДЭА4
Каментары
https://minsknews.by/rukovodstvo/
Заапарк - адно з 2-х месцаў грамадскіх прац для грамадзян у статусе "беспрацоўны". Другое - батанічны сад. Накіраванне выдаецца беспрацоўнаму на адзін дзень у батанічны сад і колькі заўгодна дзён у заапарк.
Грошы гэтым двум установам пераводзіць дзяржаўная служба занятасці. У маім выпадку 29 byn заробку прыходзіцца чакаць 30 дзён. Сёння вось акурат 30-ты. Чакаю аплаты за 18-е лістапада.