Сяброўка Дзмітрыя Шыракапытава: «Часам ён казаў, што апускаюцца рукі, але пра самагубства не заікаўся ніколі»
Марына Азаронак шмат гадоў ведала Дзмітрыя Шыракапытава, якога 12 чэрвеня знайшлі павешаным, апошнія паўгода яны дастаткова шчыльна камунікавалі, стэлефаноўваліся амаль кожны дзень.
«У канцы 90-х — пачатку 2000-х Дзмітрый быў актыўным сябрам «Белага легіёна», потым увайшоў у шэраг «Маладой Грамады». Быў скарбнікам «Маладых сацыял-дэмакратаў», арганізацыі ўтворанай пры партыі Мікалая Статкевіча. Ён вельмі балюча ўспрымаў усё тое, што адбывалася ў краіне», — расказвае Марына Азаронак.
«Дзіма быў вельмі пазітыўным хлопцам. Разумееце, кагосьці жыццё б’е моцна, кагосьці — меней. Дзіму, на мой погляд, пабіла моцна. Бывала казаў, што апускаюцца рукі, але ніколі нічога не гаварыў пра самагубства. Ён вельмі энергетычна добры чалавек», — працягвае Марына.
Апошнім часам ён зарэгістраваўся як індывідуальны прадпрымальнік. Аказваў паслугі па камп’ютарных наладках, сістэмным адміністраванні. «Напрацоўваў базу кліентаў. Я яшчэ жартавала, што стане мільянерам», — успамінае спн.Азаронак.
Не так даўно Дзмітрый Шыракапытаў развёўся з жонкай. Сяргей Марцалеў у каментах у фэйсбуку паведамляе, што гэта быў дастаткова цяжкі момант у біяграфіі Дзмітрыя. Былая жонка адсудзіла ў яго маёмасць. У Шыракапытава засталіся дзеці.
Маці Дзмітрыя Шыракапытава — кандыдат мастацтвазнаўства, мастачка Людміла Налівайка. Даследчыца творчасці беларуска-фінскага мастака Ахола-Вало. А вось бацькі ўжо няма ў жывых. Дзмітрый нарадзіўся і жыў у Мінску, яму было 36 гадоў.
У сакавіку былі затрыманні па так званай справе «Белага легіёна». Марына Азаронак кажа, што не чула, каб Шыракапытава выклікалі па допыты, ці кудысьці яшчэ па гэтай справе. «Але ён вельмі балюча ўспрымаў сітуацыю. Арыштаваныя людзі — ягоныя сябры, ён іх ведаў. Дзіма добра падтрымліваў адносіны з Міраславам Лазоўскім».
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары