Губернатар амерыканскага штата Вірджынія, дзе другі дзень праходзяць акцыі пратэсту ультраправых і іх праціўнікаў, заклікаў завадатараў сутыкненняў разысціся па дамах.
Адна жанчына загінула і прынамсі 19 чалавек пацярпелі ў выніку інцыдэнту ў горадзе Шарлатсвіл. Па апошніх дадзеных, аўтамабіль заехаў у натоўп тых, хто выступаў супраць мітынгу ультраправых.
Паліцыя арыштавала 20-гадовага Джэймса Філдса, што, як мяркуецца, сядзеў за рулём машыны. Яму прад'яўлена абвінавачванне ў забойстве другой ступені.
Па дадзеных паліцыі, яшчэ 15 чалавек пацярпелі ў выніку сутыкненняў у іншых частках горада. У некалькіх раёнах горада ўведзена надзвычайнае становішча.
«Я хачу звярнуцца да ўсіх прыхільнікаў перавагі белай расы і нацыстаў, якія сёння прыйшлі ў Шарлатсвіл. Наш зварот выразны і просты: разыходзьцеся па дамах. Гэта грамадства не прымае вас. Ганьба вам. Вы строіце з сябе патрыётаў, хоць на самай справе вы хто заўгодна, але не патрыёты», - сказаў кіраўнік штата Тэры Макаліф на прэс-канферэнцыі.
«Сёння вы прыйшлі, каб нашкодзіць людзям, і вы гэта зрабілі. Але я хачу ясна заявіць: мы мацней за вас», - дадаў ён.
Губернатар-дэмакрат таксама паведаміў, што ўжо двойчы папрасіў прэзідэнта ЗША Дональда Трампа ініцыяваць рух для згуртоўвання людзей.
Акцыя «Аб'яднаем правых» заяўлялася як мітынг пратэсту супраць планаў дэмантажу статуі генерала Роберта Лі ў парку Вызвалення (чарнаскурых рабоў) у цэнтры Шарлатсвіла і павінна была пачацца ў апоўдні па мясцовым часе. Генерал Лі камандаваў арміяй паўднёвых штатаў, якія пацярпелі паражэнне ў Грамадзянскай вайне 1861-65 гадоў.
Паліцыя абвясціла незаконным праварадыкальны мітынг і запатрабавала ад прысутных пакінуць пасля таго, як паміж мітынгоўцамі і іх супернікамі пачаліся сутыкненні.
Як паведамляе Washington Post, сярод мітынгоўцаў, якія пачалі збірацца яшчэ ў пятніцу ўвечары, была заўважана вялікая колькасць радыкалаў, у тым ліку неанацыстаў, «альтэрнатыўных правых» (белых нацыяналістаў) і актывістаў расісцкай арганізацыі «Ку-клукс-клан». Яны выкрыквалі лозунгі, у прыватнасці «Габрэй нас не заменіць», паведамляе New York Times.
Сілавікі расказалі, як гродзенскія блогеры трацілі мільён, сабраны нібыта на лячэнне дзіцяці5
Каментары