Беларусаў сярод пацярпелых ад выбуху ў Дамаску няма. Такая інфармацыя агучана ў эфіры АНТ, паведамляе БелТА.
Баевікі выпусцілі па выстаўным комплексе мінамётны снарад, які выбухнуў каля галоўнага ўваходу. Паводле папярэдняй інфармацыі, чатыры чалавекі загінулі і столькі ж атрымалі раненні.
Надзвычайны і Паўнамоцны Пасол Беларусі ў Сірыі Аляксандр Панамароў адзначыў, што ніхто з беларускіх удзельнікаў выставы не пацярпеў.
«Некаторыя працуюць на месцах, вядуць перамовы, плануем працягнуць удзел. Вайсковае кіраўніцтва запэўнівае, што гэтая акцыя разавая і што ў цяперашні час пагрозы ліквідаваныя. Выстава працягвае працу», - сказаў ён.
Дамаскі міжнародны кірмаш арганізуецца ад 1954 года і з'яўляецца адным з найстарэйшых у блізкаўсходнім рэгіёне. Аднак апошнія шэсць гадоў выстава не праводзілася з-за неспакойнай абстаноўкі ў рэгіёне. Сёлета Damascus International Fair адчыніўся 17 жніўня і працягнецца 10 дзён, у ім бяруць удзел каля 2 тыс. дэлегацый.
Тут прадстаўленыя машыны, абсталяванне, спецтэхніка, будматэрыялы, тавары народнага спажывання і ўзоры харчовай прамысловасці.
Сярод удзельнікаў - пяць беларускіх прадпрыемстваў-экспарцёраў (ААТ «БелАЗ» - кіруючая кампанія холдынгу «БелАЗ- холдынг», ААТ «Мінскі аўтамабільны завод», ААТ «МТЗ», ААТ «Магілёўліфтмаш», а таксама вытворца мэблі медыцынскага прызначэння і мэблі для дома ААТ «Ольса»).
Каментары