У інтэрвію рэсурсу sonar2050.org дэпутат Палаты прадстаўнікоў, старшыня парламенцкай камісіі па адукацыі, культуры і навуцы Ігар Марзалюк заявіў, што на яго думку, каб будаваць нармальныя міждзяржаўныя дачыненні Польшча павінна выбачыцца перад Беларуссю за свае гістарычныя грахі, у тым ліку за злачынствы Райса-Бурага, піша Радыё Свабода.
Размова з дэпутатам тычылася гістарычных пытанняў. Марзалюк, як вядома, паводле сваёй асноўнай прафесіі гісторык, доктар гістарычных навук, прафесар.
Адказваючы на пытанне журналіста, Ігар Марзалюк у прыватнасці выказаўся наконт пытаньня пра ўшанаванне памяці байцоў Арміі Краёвай у Беларусі. Тут, паводле дэпутата, паўстае шмат пытанняў:
«Польшча да гэтага часу ад нас патрабуе мемарыялізацыі дзеячаў Арміі Краёвай. Калі б яны ўсе былі паслядоўнымі барацьбітамі з Гітлерам, то чаму не. Але факты пра іншае гавораць. Рабавалі і знішчалі яны нашы вёскі. Быў відавочны і адкрыты генацыд літоўцаў і беларусаў, напрыклад, на Гарадзеншчыне. Успомніць таго ж Рамуальда Райс-Бурага. Ён выкарыстаў нямецкія метады: людзей спальвалі. Адносна нядаўняя рэабілітацыя гэтага чалавека — гэта плявок у душу беларусам беластоцкіх зямель. Як вядома, у студзені 2017 года ў памяць Бурага быў нават арганізаваны марш ва ўсходняй Польшчы. Гэта выклікала абурэньне мясцовых беларусаў. А Буры ж не адзіны такі «герой». Пара б ужо спыніць іх узвялічванне і прыдумляць абгрунтаванне іх невінаватасці».
Калі ж Марзалюка спыталіся пра будучыню беларуска-польскіх дачыненняў і ці ёсць яна, ён адказаў:
«А чаму не? Мы ж не заклікаем да помсты. Мы заклікаем да элементарнай справядлівасці. Элементарна. Трэба сказаць: «Прабачце нас».
Каментары