Таварыства беларускай мовы і Радыё Свабода запрашаюць на прэзэнтацыю найноўшага выданьня ў сэрыі «Бібліятэка Свабоды. ХХІ стагодзьдзе»
Менск, 20 сакавіка (аўторак) — 19.00, Культурны інкубатар Ок16, вул. Кастрычніцкая, 16
Горадня, 23 сакавіка (пятніца) — 18.30, этнакрама «Цудоўня», вул. Кірава, 3.
Аўтар «Падарожжа ў БНР» журналіст Радыё Свабода Сяргей Шупа расказаў пра кнігу так:
«Неяк сталася так, што мне давялося пражыць некалькі гадоў у Беларускай Народнай Рэспубліцы. Ну ня так, вядома, што я трапіў у нейкую пятлю часу, якая закінула мяне на 100 гадоў назад. Але я перабраў да апошняй старонкі ўсе тыя тысячы і тысячы дакумэнтаў, што захоўваюцца ў менскіх і віленскіх архівах, перачытаў мноства тагачасных газэт Беларусі і навакольных краінаў на ўсіх даступных мовах, сачыў за манаграфіямі і артыкуламі на тэму.
Дваццаць гадоў таму прадуктам гэтай апантанасьці сталі дзьве кнігі «Архіваў БНР». Гэта мяне трошкі адпусьціла, і я памалу адышоў ад гэтай тэмы. Думалася: ну вось, дакумэнты назьбіраліся, яшчэ выйдзе такі самы том зь менскай часткай — і пачне зьяўляцца нейкі новы творчы плён. Бо матэрыялу і для навукі, і для літаратуры там дастаткова.
Аднак таго, чаго я чакаў, я так і не дачакаўся. Навукоўцы, праўда, не падвялі — зьяўляецца нямала новых працаў, якія пашыраюць і паглыбляюць тэму. А вось папулярнай літаратуры — не відаць.
Дык і вырашыў я сесьці і пераказаць усё прачытанае і перажытае простымі словамі — тым, каму цікава і хто ня мае часу вышукваць залацінкі ў моры дакумэнтальнага матэрыялу».
Кніга выйшла пад рэдакцыяй Аляксандра Лукашука. Мастацкае афармленьне: Генадзь Мацур. Карэктар: Вінцук Вячорка.
Прадмова дырэктара Радыё Свабода Аляксандра Лукашука да кнігі «Падарожжа ў БНР»:
Уніз па лесьвіцы, што вядзе ўверх
У мінулае можна ўпасьці, як у бездань, можна
ўзьляцець, як у мару, а можна спусьціцца, як па
лесьвіцы, дзе пад кожнай прыступкай закладзеная
міна — крок за крокам, любы зь якіх можа стаць
апошнім, і таму нельга нічога прапусьціць і трэба
ўсё спраўдзіць на свае вочы і перамацаць сваімі
рукамі:
цыдулку за цыдулкай,
ліст за лістом,
даведку за даведкай,
рахунак за рахункам,
ордэр за ордэрам,
мандат за мандатам,
пасьведчаньне за пасьведчаньнем,
расьпіску за расьпіскай,
загад за загадам,
мэмарандум за мэмарандумам,
тэлеграму за тэлеграмай,
пратакол за пратаколам,
пастанову за пастановай,
акт за актам,
грамату за граматай, —
І толькі тады можна запрашаць у гэтае падарожжа
іншых і, куды б яны ні йшлі, яны выйдуць на
сьвятло, бо гэтая лесьвіца заўсёды вядзе ўверх.
* * *
У Менску ў сустрэчы возьмуць удзел гісторыкі і пісьменьнікі Натальля Гардзіенка, Вінцук Вячорка, Сяргей Дубавец, Сяргей Харэўскі і Альгерд Бахарэвіч.
Таксама будзе прадстаўлена новае дапоўненае выданьне кнігі старшыні Рады БНР Івонкі Сурвілы «Дарога». Аўтарка выступіць зь відэазваротам.
Новыя кнігі «Бібліятэкі Свабоды» прысутныя атрымаюць у падарунак.
Прыходзьце зь сябрамі!
Каментары