У нядзелю, 25 сакавіка, у Слуцкім гарадскім Доме культуры прайшоў канцэрт «Свята незалежнасці» у гонар 100-гадовага юбілею заснавання БНР, паведамляе «Інфа-Кур'ер».
Паслухаць беларускіх артыстаў прыйшлі 80 гледачоў розных узростаў. Свае песні заспявалі бард Зміцер Бартосік з Гомеля, група «ХараЧакра» з Салігорску і Алесь Дзянісаў — удзельнік групы «Dzieciuki».
У Дом культуры прыйшлі пераважна пенсіянеры, але былі сем'і з дзецьмі і маладыя людзі.
Гамяльчанін Зміцер Бартосік, які пачаў канцэрт, выканаў свае аўтарскія песні пад гітару — лірычныя і жартоўныя песні пра жыццё беларусаў.
Група «Харачакра» выступіла ў пашыраным складзе — да флейты, перкусіі і гітары далучылася бас-гітара. Лідар гурта Зміцер Гарачка сказаў, што рады, што гарадскія ўлады дазволілі гэты канцэрт, што гэта добры знак.
Апошнім у праграме выступіў Алесь Дзянісаў — лідар беларускага рок-калектыва «Dzieciuki». Ён праспяваў чатыры песні, адна з якіх была «Случакі» — пра герояў Слуцкага збройнага чыну 1920 года, якія ў свой час змагаліся за вяртанне незалежнасці Беларусі.
Каментары