У Віцебску затрымалі двух прадстаўнікоў крыміналітэту рэгіёна, паведаміў карэспандэнту БелТА начальнік аддзела па барацьбе з арганізаванай злачыннасцю 7-га ўпраўлення (па Віцебскай вобласці) ГУБАЗіК МУС Руслан Баязітаў. Затрыманні праводзіліся 5 і 9 красавіка пры сілавой падтрымцы АМАПу.
Так, 5 красавіка быў затрыманы неаднаразова судзімы жыхар абласнога цэнтра 1965 года нараджэння, які ў крымінальным асяроддзі пазіцыянаваў сябе як «сматрачы за Віцебскам». Вядома, што ў дзень затрымання ён падбухторваў двух грамадзян да дачы хабару службовым асобам пракуратуры і суда Віцебска. Сума ў $4,5 тыс. і BR600 павінна была дапамагчы вырашыць пытанне па змене меры стрымання і прызначэнні пакарання, не звязанага з пазбаўленнем волі, у дачыненні да абвінавачанага, які знаходзіцца ў СІЗА Віцебска. Затрыманаму ўдалося завалодаць часткай гэтых грошай.
6 красавіка ў дачыненні да віцебчука заведзена дзве крымінальныя справы: па ч.5 арт.16, ч.2 арт. 431 КК (падбухторванне да дачы хабару ў буйным памеры) і ч.1 арт.14, ч.3 арт.209 КК (махлярства ў буйным памеры). Санкцыі названых артыкулаў прадугледжваюць пакараннне ў выглядзе пазбаўлення волі тэрмінам да 7 гадоў з канфіскацыяй маёмасці. Абвінавачаны зняволены і змешчаны ў СІЗА Віцебска.
Па наяўнай інфармацыі, гэта не адзінкавы выпадак падбухторвання да дачы хабараў і махлярстваў з яго боку. Руслан Баязітаў растлумачыў, што затрыманы з'яўляецца прадстаўніком крыміналітэту старой фармацыі, мае шырокія сувязі сярод крымінальных аўтарытэтаў на постсавецкай прасторы.
Другі затрыманы (на фота) — беспрацоўны раней судзімы віцябчук 1976 года нараджэння. Ён з 2016 па снежань 2017 года праз махлярства завалодаў буйной сумай грошай мясцовага жыхара. Абвінавачаны падахвоціўся «аказаць садзейнічанне» ў вяртанні грошай даўжнiка, выкарыстоўваючы свой ўяўны аўтарытэт у крымінальных колах. Грашовыя сродкі даўжнік стаў вяртаць, але да крэдытора яны так і не дайшлі. У выніку даўжнік вымушаны быў звярнуцца ва ўпраўленне па барацьбе з арганізаванай злачыннасцю. Акрамя таго, шляхам вымагальніцтва пад пагрозай прымянення гвалту і з прымяненнем гвалту прымушаў пацярпелага аплачваць крэдыт у памеры больш за Br2 тыс., аформлены на іншую асобу. Грошы пералічваліся на банкаўскую картку падазраванага, былі і наяўныя плацяжы — штомесяц ён атрымліваў ад ахвяры $150, у тым ліку за так званае крымінальнае заступніцтва.
Віцебскім ГАСК 9 і 11 красавіка ў дачыненні да затрыманага распачаты крымінальныя справы па ч.3 арт.209 (махлярства ў буйным памеры), ч.2 арт. 208 КК (вымагальніцтва з пагрозай прымянення гвалту і ўжываннем гвалту). Санкцыі названых артыкулаў прадугледжваюць пакаранне ў выглядзе пазбаўлення волі тэрмінам да 10 гадоў з канфіскацыяй маёмасці. Абвінавачаны арыштаваны і змешчаны ў СІЗА Віцебска. Праваахоўнікі правяраюць інфармацыю аб здзяйсненні ім аналагічных злачынстваў раней. Грамадзяне, пацярпелыя ад супрацьпраўнай дзейнасці мужчыны, могуць паведаміць інфармацыю па тэлефонах 8 (029) 714 44 25, 8 (0212) 66 50 44, 67 48 76 або 8 (033) 399 80 44.
Цяпер чытаюць
«Міс Беларусь» усё больш нагадвае конкурс прыгажосці ў гарэме20
Каментары