У Мінск прылятае прадстаўніца Еўракамісара ў пытаннях замежнай палітыкі і бяспекі Хаўера Саланы.
У Мінск прылятае прадстаўніца Еўракамісара ў пытаннях замежнай палітыкі і бяспекі Хаўера Саланы Хельга Шміт.
Менавіта яна вядзе непасрэдныя перамовы з кіраўніцтвам Беларусі наконт паляпшэння стасункаў з Еўрасаюзам. Хельга Шміт — галоўная асоба ад Бруселя на перамовах у Мінску. Ейны прыезд пройдзе ў рамках чарговага працоўнага візіту.
Сп‑ня Шміт традыцыйна выслухае два бакі: уладу і апазіцыю.
Старшыня АГП Анатоль Лябедзька сёння таксама запрошаны на размову:
«Гэта адкладзеная паездка. Яна планавалася раней. Але такім чынам, відаць, Мінску далі зразумець, што калі з яго боку не будзе нейкіх, хоць маленькіх, крокаў, то высокія чыноўнікі з Еўропы не будуць сюды спяшацца. (…)
Не думаю, што яна едзе віншаваць з Новым годам і Калядамі беларускіх чыноўнікаў.Відаць, сітуацыя набліжаецца да таго, што патрэбна фармуляваць вельмі выразна і ясна парадак дня, які трэба абмяркоўваць. І які стаіць у парадку ўзаемаадносінаў Еўропы і Беларусі».
Беларускія ўлады таксама рыхтуюцца да гэтага візіту. Прынамсі 12 снежня Палата прадстаўнікоў адзінагалосна ратыфікавала пагадненне паміж Беларуссю і Еўракамісіяй аб прадстаўніцтве Еўрапейскай камісіі ў Беларусі, а таксама аб прывілеях і імунітэце для яго. Дэпутаты рабілі гэта ўжо другі раз. Упершыню — яшчэ 17 чэрвеня, і тады пагадненне ратыфікавалі дэпутаты папярэдняга складу. Аднак Савет Рэспублікі — таксама папярэдняга складу — вярнуў дакумент у Палату. Таму дэпутаты вымушаныя вярнуцца да пагаднення паўторна.
Дэпутат Валянціна Лявоненка з міжнароднай камісіі Палаты прадстаўнікоў патлумачыла гэта так:
«Беручы пад увагу тэндэнцыю да ўсталявання ўзаемавыгаднага супрацоўніцтва з краінамі еўрапейскага рэгіёну і патрэбу ў ратыфікацыі гэтага пагаднення, наша камісія паўторна разгледзела дакумент. Мы рэкамэндуем Палаце прадстаўнікоў яго прыняць».
А на пытанне, ці не атрымаецца так, што Савет Рэспублікі зноў верне пагадненне ў Палату прадстаўнікоў, сп‑ня Лявоненка запэўніла:
«Да тэксту пагаднення заўвагаў няма. Праблема была ў тым, што чальцам Савета Рэспублікі быў патрэбны час, каб удакладніць некаторыя пытанні».
Палітоляг Ігар Лялькоў таксама ўпэўнены, што гэтым разам верхняя палата Нацыянальнага сходу не будзе вяртаць пагадненне:
«Вядома, што за гэты час выйшаў указ Лукашэнкі, у якім таксама абгаворваюцца прывілеі для прадстаўніцтва Еўракамісіі і ўвогуле пэўныя льготы для сумесных праграмаў Еўрасаюза з Беларуссю.
Я думаю, што паўторная ратыфікацыя і ўпэўненасць, што Савет Рэспублікі не будзе вяртаць гэты дакумент, якраз і звязаная з удакладненнем пазіцыі Аляксандра Лукашэнкі».
Цяпер чытаюць
Фіналістак конкурсу «Міс Беларусь — 2025» вывелі на сцэну ў касцюмах з цытатамі Лукашэнкі11
Каментары