U Minsk prylataje pradstaŭnica Jeŭrakamisara ŭ pytańniach zamiežnaj palityki i biaśpieki Chaŭjera Sałany.
U Minsk prylataje pradstaŭnica Jeŭrakamisara ŭ pytańniach zamiežnaj palityki i biaśpieki Chaŭjera Sałany Chielha Šmit.
Mienavita jana viadzie niepasrednyja pieramovy z kiraŭnictvam Biełarusi nakont palapšeńnia stasunkaŭ ź Jeŭrasajuzam. Chielha Šmit — hałoŭnaja asoba ad Brusiela na pieramovach u Minsku. Jejny pryjezd projdzie ŭ ramkach čarhovaha pracoŭnaha vizitu.
Sp‑nia Šmit tradycyjna vysłuchaje dva baki: uładu i apazicyju.
Staršynia AHP Anatol Labiedźka siońnia taksama zaprošany na razmovu:
«Heta adkładzienaja pajezdka. Jana płanavałasia raniej. Ale takim čynam, vidać, Minsku dali zrazumieć, što kali ź jaho boku nie budzie niejkich, choć maleńkich, krokaŭ, to vysokija čynoŭniki ź Jeŭropy nie buduć siudy śpiašacca. (…)
Nie dumaju, što jana jedzie vinšavać z Novym hodam i Kaladami biełaruskich čynoŭnikaŭ.Vidać, situacyja nabližajecca da taho, što patrebna farmulavać vielmi vyrazna i jasna paradak dnia, jaki treba abmiarkoŭvać. I jaki staić u paradku ŭzajemaadnosinaŭ Jeŭropy i Biełarusi».
Biełaruskija ŭłady taksama rychtujucca da hetaha vizitu. Prynamsi 12 śniežnia Pałata pradstaŭnikoŭ adzinahałosna ratyfikavała pahadnieńnie pamiž Biełaruśsiu i Jeŭrakamisijaj ab pradstaŭnictvie Jeŭrapiejskaj kamisii ŭ Biełarusi, a taksama ab pryvilejach i imunitecie dla jaho. Deputaty rabili heta ŭžo druhi raz. Upieršyniu — jašče 17 červienia, i tady pahadnieńnie ratyfikavali deputaty papiaredniaha składu. Adnak Saviet Respubliki — taksama papiaredniaha składu — viarnuŭ dakumient u Pałatu. Tamu deputaty vymušanyja viarnucca da pahadnieńnia paŭtorna.
Deputat Valancina Lavonienka ź mižnarodnaj kamisii Pałaty pradstaŭnikoŭ patłumačyła heta tak:
«Bieručy pad uvahu tendencyju da ŭstalavańnia ŭzajemavyhadnaha supracoŭnictva z krainami jeŭrapiejskaha rehijonu i patrebu ŭ ratyfikacyi hetaha pahadnieńnia, naša kamisija paŭtorna razhledzieła dakumient. My rekamendujem Pałacie pradstaŭnikoŭ jaho pryniać».
A na pytańnie, ci nie atrymajecca tak, što Saviet Respubliki znoŭ viernie pahadnieńnie ŭ Pałatu pradstaŭnikoŭ, sp‑nia Lavonienka zapeŭniła:
«Da tekstu pahadnieńnia zaŭvahaŭ niama. Prablema była ŭ tym, što čalcam Savieta Respubliki byŭ patrebny čas, kab udakładnić niekatoryja pytańni».
Palitolah Ihar Lalkoŭ taksama ŭpeŭnieny, što hetym razam vierchniaja pałata Nacyjanalnaha schodu nie budzie viartać pahadnieńnie:
«Viadoma, što za hety čas vyjšaŭ ukaz Łukašenki, u jakim taksama abhavorvajucca pryvilei dla pradstaŭnictva Jeŭrakamisii i ŭvohule peŭnyja lhoty dla sumiesnych prahramaŭ Jeŭrasajuza ź Biełaruśsiu.
Ja dumaju, što paŭtornaja ratyfikacyja i ŭpeŭnienaść, što Saviet Respubliki nie budzie viartać hety dakumient, jakraz i źviazanaja z udakładnieńniem pazicyi Alaksandra Łukašenki».
Kamientary