25 Сакавіка, дзень абвешчання БНР, бадай, адно з самых галоўных святаў беларусаў замежжа.
Амэрыканскія беларусы старэйшага пакалення адзначаюць гэтае свята штогод у сваіх грамадска-культурных асяродках: ладзяць мітынгі, арганізуюць банкеты з прамовамі з трыбуны, урачыстымі прывітаннямі ад мясцовых губернатараў, канцэртамі беларускай музыкі, выставамі беларускіх мастакоў. Хваля новай эміграцыі з Беларусі дадала да спосабаў адзначэння гадавіны БНР свае ідэі: сустрэчы у начных клубах з канцэртамі і віктарынамі, забегі і нават мінулагодні парад ровараў.
Новы фармат святкавання ўзнік дзякуючы Ганне Шарко, каторая чатыры гады назад стварыла суполку ў Фэйсбуку ''Беларусы ЗША. Разам лягчэй''. За чатыры гады Ганна, яе муж Аляксандр Мазгавы і каманда сяброў-актывістаў арганізавалі дзясяткі сяброўскіх сустрэч для беларусаў: гэта і тэматычныя сустрэчы ў клюбах, і прагулкі на прыродзе за горадам, пікнікі ў парках і сустрэчы на пляжы.
Сёлета на святкаванне Дня Волі Ганна з камандай сумесна з Беларуска-Амэрыканскім Задзіночаннем ''Пагоня'' падрыхтавалі праграму Музычны Фрэш.
Прысутных чакалі выступы Яўгена Сокалава (ZnaROCK), Германа Жыгала і гурту Kazinak. Святкаванне прайшло 23-га сакавіка ва ўтульным манхэтанскім клюбе NUBLU. Для гурту Kazinak гэта быў дэбют. Яны зайгралі хіты Лявона Вольскага і Ляпісаў, а таксама прадставілі ўласную кампазіцыю. Ёсць надзея, што Kazinak працягне творчы працэс.
Усе прысутныя аўтаматычна сталі ўдзельнікамі лятарэі, на якой былі разыграны беларускія сувеніры ад спонсараў і некалькі беларускіх кніг, перададзеных у якасці падарунку ад Беларускай Фундацыі імя Пётры Крачэўскага.
Каментары