Расійская спецслужба выкарыстоўвае беларусаў у якасці правадыроў для перапраўкі сваіх агентаў ва Украіну. Такія высновы напрошваюцца пасля чытання пастановы Вінніцкага гарадскога суда аб вызваленні ад крымінальнай адказнасці грамадзяніна Расіі, у дачыненні да якога была заведзена крымінальная справа па артыкулах «падрыхтоўка да здзяйснення злачынства» і «шпіянаж», паведамляюць Моцныя навіны.
Раніцай 16 жніўня з боку мяжы з Беларуссю ў пункт пропуску Выступовічы прыйшоў мужчына, які паказаў украінскім памежнікам пашпарт грамадзяніна Расіі і звярнуўся з заявай аб прадастаўленні яму палітычнага прытулку.
Са слоў расіяніна, на радзіме ён пад псіхалагічным і фізічным ціскам вымушаны быў супрацоўнічаць з ФСБ. Нібыта на працягу 2013—2015 гадоў ён працаваў на ФСБ.
У лютым 2015 года мужчына пераехаў у Санкт-Пецярбург, дзе ўладкаваўся на працу ў арганізацыю, якая займалася рамонтам на тэрыторыі абароннага завода. Там ён падтрымліваў сувязь і выконваў заданні іншага куратара ФСБ. А потым яму гэта ўсё, як гаворыцца, надакучыла, і ён вырашыў спыніць супрацоўніцтва са спецслужбай. Зрабіць гэта можна было толькі адным спосабам, але, акрамя Украіны, бегчы не было куды.
7 верасня агент Паўночны сам прыйшоў ва УСБ Вінніцкай вобласці з пісьмовай заявай, што ўсё, пра што ён раней распавёў, было распрацаванай яго куратарам легендай, а насамрэч ён атрымаў заданне атрымаць ва Украіне статус бежанца і заняцца шпіёнскай дзейнасцю.
Агента Паўночнага па хадайніцтве пракуратуры суд вызваліў ад крымінальнай адказнасці. Цяпер, мяркуючы па ўсім, экс-шпіён чакае атрымання статусу бежанца.
Як паведаміў агент Паўночны, падрыхтоўка да яго засылання ва Украіну пачалася ў снежні 2019 года, калі ад свайго куратара ў Санкт-Пецярбургу ён атрымаў заданне з'ездзіць у Мазыр і пазнаёміцца з мясцовым жыхаром, які таемнымі сцежкамі забяспечвае нелегальны пераход мяжы.
6 жніўня агент атрымаў ад свайго куратара 2 тысячы даляраў, а 9 жніўня адправіўся ў шлях па загадзя агавораным маршруце: Санкт-Пецярбург — Кінгісеп — Гдоў — Пскоў — Себеж — Асвея — Полацк — Мінск — Мазыр. У Мазыры ён сустрэўся з правадніком, які дапамог яму перасекчы беларуска-ўкраінскую мяжу. Па словах агента, ішлі яны ўздоўж нафтаправода «Дружба», строга прытрымліваючыся інструкцыі яго куратара ў ФСБ.
Сёння пастанова суда ўступіла ў законную сілу.
Цяпер чытаюць
«Засяроджуся на працы з ЗША». Ціханоўскі расказаў пра свае палітычныя планы на 2026 год21
Каментары