У Кітаі пачалася кампанія супраць папулярных міжнародных брэндаў адзення, сярод якіх H&M і Nike, за іх леташнія выказванні наконт прымусовай працы ўйгураў на плантацыях бавоўны.
Летась шведская кампанія H&M выказала заклапочанасць пасля інфармацыі ад праваабаронцаў наконт прымусовай працы і дыскрымінацыі этнічных меншасцяў у аддаленай кітайскай правінцыі Сіньцзянь, дзе вырошчваецца бавоўна. Кампанія таксама адзначыла, што спыняе пастаўкі бавоўны з гэтага рэгіёна.
Заява была зробленая шмат месяцаў таму і да гэтага часу не прыцягвала ўвагі з боку кітайскага ўрада. Аднак цяпер кампанію абвінавачваюць ва ўмяшанні ва ўнутраныя справы краіны, а таксама ў ачарненні і паклёпе на кітайскі ўрад, піша The Wall Street Journal.
Нядаўна ЕС увёў санкцыі супраць Кітая за парушэнне правоў чалавека ў Сіньцзяні, дзе кітайскія ўлады праводзілі рэпрэсіўную палітыку ў адносінах да ўйгураў і іншых этнічных меншасцяў рэгіёна пераважна мусульманскага веравызнання. Па словах праваахоўнікаў, рэпрэсіі ўключаюць у сябе затрыманні без суда і прымусовую працу на дзяржаўных фабрыках.
Кітай адмаўляе ўсе абвінавачванні ў парушэнні правоў чалавека і адзначае, што лагеры для інтэрніраваных з’яўляюцца цэнтрамі прафесійнай падрыхтоўкі, накіраваныя на барацьбу з тэрарызмам і рэлігійным экстрэмізмам.
Пасля ўведзеных санкцый дзяржаўныя СМІ, карыстальнікі сацыяльных сетак і спонсары знакамітасцяў пачалі заклікаць да байкоту заходніх брэндаў адзення, якія ўдзельнічаюць у ініцыятыве Better Cotton Initiative (BCI). Гэта некамерцыйная арганізацыя, якая сертыфікуе фермы адпаведна са сваімі стандартамі па вырошчванні бавоўны.
BCI унесла ў чорны спіс кітайскага вытворцу бавоўны за ўдзел у парушэнні правоў чалавека ў Сіньцзяні. Таксама арганізацыя спыніла ліцэнзаванне фермерскіх гаспадарак у гэтым рэгіёне.
У склад арганізацыі ўваходзяць такія буйныя кампаніі, як Nike, Adidas, H&M, IKEA. Цяпер кітайскія карыстальнікі сацсетак актыўна заклікаюць не выкарыстоўваць прадукцыю гэтых брэндаў. Гандлёвыя пляцоўкі ў Кітаі пачалі адмаўляцца ад супрацоўніцтва з H&M і іншымі кампаніямі, а кітайскія знакамітасці спыняюць кантракты з вядомымі брэндамі.
Сама кампанія H&M заяўляе, што прытрымліваецца міжнародных прынцыпаў устойлівага развіцця і не падтрымлівае выкарыстанне прымусовай працы ў сваіх пастаўках. Прадстаўнікі кампаніі таксама адзначылі, што з павагай ставяцца да кітайскіх спажыўцоў і не займаюць ніякай палітычнай пазіцыі.
Цяпер чытаюць
Модная мінская кавярня «Маркс» трапіла ў скандал: адтуль папрасілі сысці жанчыну, якая малявала. Але ўсё не так адназначна18
Каментары