ПВТ хоча распрацаваць «аператыўныя меры падтрымкі ІТ». Просіць кампаніі прапаноўваць варыянты
У телеграм-каналах 7 сакавіка з'явілася паведамленне, што адміністрацыя ПВТ рассылае рэзідэнтам лісты, дзе паведамляе аб «працы па распрацоўцы аператыўных мер падтрымкі ІТ-галіны». І заклікае кампаніі падзяліцца прапановамі, «якія дапамогуць кампаніі сёння». Прэс-служба ПВТ пацвердзіла dev.by рэальнасць такой рассылкі.
«Паважаныя кіраўнікі кампаній-рэзідэнтаў ПВТ! Адміністрацыя ПВТ сумесна з дзяржорганамі вядзе працу па распрацоўцы аператыўных мер падтрымкі ІТ-галіны і яе далейшага развіцця ва ўмовах бягучай сітуацыі. Нам важна пачуць меркаванне кожнага рэзідэнта і ў першую чаргу — вашы прапановы па першачарговых мерах, якія дапамогуць вашай кампаніі сёння», — напісана ў лісце.
Падпісанае паведамленне намеснікам дырэктара адміністрацыі ПВТ Аляксандрам Марцінкевічам.
У ПВТ ад дадатковых каментароў адмовіліся.
Пасля нападу Расіі на Украіну і анансавання балючых санкцый супраць Расіі і Беларусі, тэрыторыя якой выкарыстоўваецца агрэсарам для атак, «Наша Ніва» атрымала шмат сігналаў пра імклівую рэлакацыю праграмістаў.
Кіраўнікі беларускіх кампаній называюць прычынамі рэзкіх уцёкаў некалькі асноўных фактараў.
— Заходнія замоўшчыкі адмаўляюцца супрацоўнічаць з юрыдычнымі асобамі, размешчанымі ў Беларусі, а таксама купляць прадукт, зроблены ў Беларусі.
Гэта частка агульнасусветнага трэнда па выпіхванні беларускіх і расійскіх тавараў са сваіх рынкаў, гэта датычыць і ІТ-тавараў таксама. Ставіцца ўмова змены юрысдыкцыі кампаніі і знаходжання людзей.
— Глабальны рынак ІТ-аўтсорсу страціў гіганцкую частку працоўнай сілы пасля пачатку вайны ва Украіне — дзясяткі тысяч украінскіх праграмістаў не могуць нармальна працаваць, займаючыся пытаннямі абароны Радзімы і выжываннем.
Роўна як і не могуць пакінуць тэрыторыю краіны, бо хлопцаў прызыўнога ўзросту, якіх большасць у прафесіі, не выпускаюць за мяжу. ІТ-кампаніі непакояцца, што, калі Лукашэнка пачне вайну і абвесціць мабілізацыю, у той самай сітуацыі апынуцца з дзясяткамі тысяч беларускіх супрацоўнікаў, якія ўмомант стануць невыязнымі, то лепш эвакуяваць іх, пакуль можна.
— Адзначаюцца праблемы фінансавых разлікаў з кліентамі, калі ў іх нават і няма прынцыповых пазіцый па размяшчэнні персанала: няма ніякай гарантыі, што ў кароткатэрміновай ці сярэднетэрміновай перспектыве плацяжы ў бок Беларусі з Захаду будуць ажыццяўляцца.
— Таксама няма ніякіх гарантый, што можна будзе выплачваць заробкі ў доларах, як было дамоўлена кантрактамі. Бо з пагаршэннем валютнай сітуацыі з'явілася праблема, што пры налічванні заробку на доларавую карту банк залічвае яе па афіцыйным курсе, але, за кошт вялікага спрэду паміж купляй і продажам долара (2,8—3,5), пры разліку такой картай адтуль спісваецца у рублях больш, чым было залічана.
Адпаведна, заробак праграміста падае з тэмпамі інфляцыі (выдаваць валютай заробак у Беларусі нельга, як і разлічвацца, на ўзроўні бухгалтэрыі прадпрыемстваў і аплаты ўсё канвертуецца ў рублі)».
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі22
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі
«Незалежнасць не падае з неба і не даецца назаўсёды. Яе трэба абараняць». Ціханоўская выступіла з заявай да 35-годдзя прыняцця Дэкларацыі аб суверэнітэце4141
Каментары