Цяпер толькі на запчасткі. З Украіны ў Чачню вывезлі сельгастэхнікі на $5 млн, а яе дыстанцыйна заблакавалі
Расійскія вайскоўцы ў акупаваным горадзе Мелітопалі скралі ўсю сельскагаспадарчую тэхніку ў дылера і адправілі яе ў Чачню. Але адправіўшы крадзенае за 1100 км злодзеі не змаглі карыстацца машынамі, бо абсталяванне было заблакаванае дыстанцыйна, піша CNN.
У апошнія тыдні паступала ўсё большая колькасць паведамленняў аб крадзяжы расійскімі вайскоўцамі сельскагаспадарчага абсталявання, збожжа і нават будаўнічых матэрыялаў — не кажучы пра рабаванне жылых памяшканняў.
Але вываз каштоўнага сельскагаспадарчага абсталявання ад дылера John Deere ў Мелітопалі быў арганізаваным, бо для вывазу выкарысталі расійскі вайсковы транспарт.
Як стала вядома CNN, тэхніку вывезлі з дылерскага цэнтра «Агратэк» у Мелітопалі, які з пачатку сакавіка акупаваны расіскімі войскамі. Агулам тавар ацэнены амаль у 5 мільёнаў даляраў. Адныя зернеўборачныя камбайны каштуюць па 300 тысяч даляраў кожны.
Расійскія вайскоўцы вывезлі 27 адзінак сельгастэхнікі. На адным з грузавікоў з платформай, які быў зняты на камеру, быў намаляваны белы знак «Z».
Частка тэхнікі была дастаўленая ў суседнюю вёску, а іншая частка яе адправілася ў доўгую наземную вандроўку за 1100 км у Чачню. Рух тэхнікі адсачылі па GPS. Апошні раз машыны бачылі ў сяле Захан-Юрт.
«Калі захопнікі загналі скрадзеныя камбайны ў Чачню, яны зразумелі, што нават не могуць іх завесці, бо камбайны былі заблакаваныя дыстанцыйна», — расказаў суразмоўца. Цяпер тэхніка, відаць, стаіць на ферме пад Грозным. Але выданне піша, што «падобна да таго, што ўгоншчыкі знайшлі ў Расіі кансультантаў, якія спрабуюць абысці блакіроўку».
Цяпер адзіны спосаб нешта зарабіць — прадаць тэхніку на запчасткі.
Іншыя крыніцы ў Запарожскай вобласці сцвярджаюць, што цяпер расійскія вайскоўцы крадуць збожжа, якое захоўваецца ў бункерах.
Цяпер чытаюць
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы13
Каментары