Ciapier tolki na zapčastki. Z Ukrainy ŭ Čačniu vyvieźli sielhastechniki na $5 młn, a jaje dystancyjna zabłakavali
Rasijskija vajskoŭcy ŭ akupavanym horadzie Mielitopali skrali ŭsiu sielskahaspadarčuju techniku ŭ dylera i adpravili jaje ŭ Čačniu. Ale adpraviŭšy kradzienaje za 1100 km złodziei nie zmahli karystacca mašynami, bo abstalavańnie było zabłakavanaje dystancyjna, piša CNN.
U apošnija tydni pastupała ŭsio bolšaja kolkaść paviedamleńniaŭ ab kradziažy rasijskimi vajskoŭcami sielskahaspadarčaha abstalavańnia, zbožža i navat budaŭničych materyjałaŭ — nie kažučy pra rabavańnie žyłych pamiaškańniaŭ.
Ale vyvaz kaštoŭnaha sielskahaspadarčaha abstalavańnia ad dylera John Deere ŭ Mielitopali byŭ arhanizavanym, bo dla vyvazu vykarystali rasijski vajskovy transpart.
Jak stała viadoma CNN, techniku vyvieźli z dylerskaha centra «Ahratek» u Mielitopali, jaki z pačatku sakavika akupavany rasiskimi vojskami. Ahułam tavar acenieny amal u 5 miljonaŭ dalaraŭ. Adnyja ziernieŭboračnyja kambajny kaštujuć pa 300 tysiač dalaraŭ kožny.
Rasijskija vajskoŭcy vyvieźli 27 adzinak sielhastechniki. Na adnym z hruzavikoŭ z płatformaj, jaki byŭ źniaty na kamieru, byŭ namalavany bieły znak «Z».
Častka techniki była dastaŭlenaja ŭ susiedniuju viosku, a inšaja častka jaje adpraviłasia ŭ doŭhuju naziemnuju vandroŭku za 1100 km u Čačniu. Ruch techniki adsačyli pa GPS. Apošni raz mašyny bačyli ŭ siale Zachan-Jurt.
«Kali zachopniki zahnali skradzienyja kambajny ŭ Čačniu, jany zrazumieli, što navat nie mohuć ich zavieści, bo kambajny byli zabłakavanyja dystancyjna», — raskazaŭ surazmoŭca. Ciapier technika, vidać, staić na fiermie pad Hroznym. Ale vydańnie piša, što «padobna da taho, što ŭhonščyki znajšli ŭ Rasii kansultantaŭ, jakija sprabujuć abyści błakiroŭku».
Ciapier adziny sposab niešta zarabić — pradać techniku na zapčastki.
Inšyja krynicy ŭ Zaparožskaj vobłaści śćviardžajuć, što ciapier rasijskija vajskoŭcy kraduć zbožža, jakoje zachoŭvajecca ŭ bunkierach.
Kamientary