Тэцуя Ямагамі, які падазраецца ў забойстве былога прэм'ер-міністра Японіі Сіндза Абэ, патлумачыў свае дзеянні помстай у адрас рэлігійнай групы, ад якой нібы пацярпела яго сям'я. Ён меркаваў, што забіты меў да яе дачыненне. Але ці гэта так, пакуль невядома.
Пра гэта піша «Медуза» са спасылкай на японскія СМІ. Згодна з гэтымі публікацыямі, Ямагамі заявіў следчым, што ў яго сям'і пачаліся цяжкасці з-за ўступлення ў гэтую арганізацыю і ахвяраванні ёй грошай. У артыкулах згадваюцца банкруцтва яго маці і «распад» яго сям'і.
Ямагамі сцвярджае, што здзейсніў злачынства, паколькі лічыў Сіндза Абэ датычным да гэтай арганізацыі, а не з-за прэтэнзій да яго палітычнай дзейнасці. Ён таксама нібыта хацеў забіць іншую высокапастаўленую асобу з гэтай арганізацыі, але адмовіўся ад гэтага з-за складанасці.
Японскія журналісты не ўдакладняюць, ці ёсць даныя аб датычнасці нябожчыка да якой-небудзь рэлігійнай арганізацыі.
Назва гэтай арганізацыі не ўзгадваецца.
The Mainichi піша, што Ямагамі падчас допыту нібыта зрабіў некалькі «бессэнсоўных» заяў, і следства мае намер ацаніць яго псіхічны стан.
Былы прэм'ер-міністр Японіі Сіндза Абэ быў смяротна паранены раніцай 8 ліпеня ў горадзе Нара, дзе выступаў на перадвыбарным мітынгу. Ён памёр у бальніцы, не прыходзячы ў прытомнасць. Яму было 67 гадоў.
Падазраваны — 41-гадовы мясцовы жыхар Тэцуя Ямагамі — быў затрыманы на месцы злачынства. Пра яго вядома, што ў 2000-я гады ён служыў у Марскіх сілах самаабароны Японіі.
Цяпер чытаюць
«ЗША хочуць нармалізацыі літоўска-беларускіх адносін. Адсюль і рухі з офісам Ціханоўскай»9
Каментары