Еўракамісія ў пятніцу анансавала сёмы пакет санкцый супраць Расіі за яе ўварванне ва Украіну. Сярод прапанаваных захадаў — эмбарга на золата і пашырэнне забароны на экспарт тэхналогій у РФ. Пра гэта гаворыцца ў заяве Еўрапейскай камісіі.
«Сёння Еўрапейская камісія ўхваліла сумесную прапанову аб новым пакеце захадаў для падтрымкі і ўзмацнення эфектыўнасці шасці маштабных і беспрэцэдэнтных пакетаў санкцый ЕЗ супраць Расіі», — заявілі ў Еўракамісіі.
Сёмы санкцыйны пакет будзе накіраваны на ўзгадненне і тлумачэнне мераў, прадугледжаных папярэднімі пакетамі, і на ўзгадненне мерапрыемстваў сярод усіх краін-партнёраў, у прыватнасці G7.
Еўракамісія таксама прапануе працягнуць дзеянне санкцый да студзеня 2023 года, заявіла прэзідэнт ЕК Урсула фон дэр Ляен.
У канцы студзеня адбудзецца наступны перагляд тэрмінаў і мерапрыемстваў. Акрамя таго, новымі санкцыямі прапануюць забараніць імпарт расійскага золата і пры гэтым узмацніць кантроль над экспартам тавараў падвойнага прызначэння і перадавых тэхналогій. У ЕК лічаць, што гэта ўзмоцніць узгодненасць санкцый ЕС з санкцыямі партнёраў па G7 і зробіць больш суровымі патрабаванні да справаздачнасці, каб актывізаваць замарожванне расійскіх актываў краінамі Еўрасаюза.
Санкцыі ЕС не закрануць гандаль сельскагаспадарчай прадукцыяй паміж трэцімі краінамі і Расіяй, падкрэслілі ў ЕС.
Кіраўнік еўрапейскай дыпламатыі Жазэп Барэль дадаў, што новымі санкцыямі блок працягне атакаваць атачэнне прэзідэнта РФ Уладзіміра Пуціна. «У дадатак да гэтых мер я таксама буду прадстаўляць Радзе [ЕС] прапановы па ўключэнні ў спіс іншых фізічных і юрыдычных асоб з замарожваннем іх актываў і абмежаваннем магчымасці падарожнічаць», — сказаў Барэль.
Пасля прадстаўлення пакета Еўракамісіяй ён будзе абмяркоўвацца дзяржавамі-ўдзельніцамі ў Радзе Еўрасаюза.
Цяпер чытаюць
Дэпартаваныя пры пасярэдніцтве амерыканцаў палітвязні завіслі між пеклам і зямлёю — без ДНЖ і магчымасці працаваць11
Каментары