Днямі Белстат апублікаваў статыстыку, якая тычыцца дэмаграфічна-палавога падзелу насельніцтва ў беларускіх рэгіёнах. Паводле яе, у пераважнай большасці гарадоў больш жанчын, і толькі ў чатырох — Астравец, Івацэвічы, Відзы і Шклоў — пераважаюць мужчыны. Чаму так ёсць менавіта ў Шклове, выказала меркаванне выданне Orsha.eu.
Само тое, што ў цэлым па краіне мужчын менш (жанчын — 46,2% ад усяго насельніцтва), — не дзіўна. Такі невялікі перакос у бок жанчын назіраецца ад пачатку вядзення статыстыкі. Але дзіўна, што некаторыя гарады выбіваюцца з гэтай статыстыкі, і гэта яўна мусіць нечым тлумачыцца.
Напрыклад, у Астраўцы можна меркаваць, што рост мужчынскага насельніцтва адбыўся пасля будаўніцтва атамнай электрастанцыі, якая запатрабавала шмат маладых спецыялістаў. «Але чаму Шклоў? — задаецца пытаннем Orsha.eu. — У Шклове няма нейкіх чыста мужчынскіх вялікіх прадпрыемстваў».
Прадпрыемстваў сапраўды няма, але затое ёсць вялізная калонія. І калонія гэта мужчынская. Відаць, менавіта за кошт яе мужчынскага насельніцтва ў гэтым горадзе больш, чым жаночага, робіць дапушчэнне выданне.
«Таму, на жаль, жанчынам радавацца не прыходзіцца. Вядома, чыста па лічбах тут мужчын можа хапіць на ўсіх, але на практыцы мужчыны гэтыя аддзеленыя ад жанчын сцяной і калючым дротам», — канстатуе Orsha.eu.
Варта дадаць, што ў іншым горадзе з чатырох, у якім сярод насельніцтва пераважаюць мужчыны, Івацэвічах, таксама ёсць ВК-5 — мужчынская калонія строгага рэжыму.
Чытайце таксама:
Усяго ў чатырох беларускіх гарадах мужчын больш, чым жанчын
Цяпер чытаюць
Беларус раптоўна і без дай прычыны знік у 2006 годзе, а праз 19 гадоў знайшоўся ў вёсцы пад Смаленскам3
Каментары
Не самцоуски, а альфа-самцоуски.