Падаецца, не так і даўно адкрывалі ў Белавежскай пушчы рэзідэнцыю галоўнага беларускага Дзеда Мароза, а налета ўжо 20 гадоў будзе. Каля двух мільёнаў гасцей-наведвальнікаў сустрэлі тут за гэты час. Ці справіўся б Дзядуля адзін з такой работай? Мабыць, не. А стаміўся б, дык яшчэ, чаго добрага, збег ад нас на які халодны полюс… Але наш галоўны навагодні чараўнік пачувае сябе добра ў векавым лесе, бо ў яго шмат памочнікаў. І першая сярод іх — казачная ўнучка Снягурка, піша «Звязда».
Летам яна жыве ў Антарктыдзе, а на зіму прыязджае сюды, у пушчу, каб дарыць людзям навагодні настрой і падарункі, дапамагаць разбіраць вялікую пошту. Апошнія гады Снягурка прыязджае ў пушчу не адна, а са світай — матухнай Зімой, а яшчэ з Завеяй, Сцюжай і Мяцеліцай, і ўсе яны ў зімовыя месяцы самааддана працуюць у памесці на карысць зімовай казкі. Вось і сёння доўгачаканыя госці завіталі ў пушчу, сустрэліся пасля доўгай разлукі з Дзядулем Марозам.
Казачны Дзед сустрэў іх ля варот сваёй рэзідэнцыі:
— Як я сумаваў без вас, як чакаў! Шматлікія госці нашы, дарослыя і дзеці, таксама чакалі. Праходзьце і далучайцеся да нашага свята!
Снягурка, якая без справы ў сваёй халоднай летняй кватэры не сядзела, а рыхтавала падарункі, адразу ўзялася за работу. Усіх сустракала, прывячала, на добрыя словы не скупілася. Свята, якое назвалі «Белавежская казка», разгарнулася па ўсім маёнтку. Удзельнікі фестывалю аніматараў і тэатраў гульні «Добрыя чараўнікі» сабралі мноства гледачоў, далучылі гасцей да сапраўднай феерычнай дзеі. Тут усе спявалі, танцавалі, а галоўнае, усміхаліся разам. Самадзейныя калектывы, якія выступалі на імправізаванай сцэне, таксама задавалі святочны настрой. Маршам прайшоў аркестр Дзядоў Марозаў.
Госці з задавальненнем гулялі па рэзідэнцыі, цуды тут чакаюць ледзь не на кожным кроку. Ля чароўнага млына можна загадаць жаданне, але перад гэтым трэба папрасіць млын перамалоць усё дрэннае. І млын паслухае і перамеле… А ўжо потым на паляне 12-ці месяцаў папрасіць заступніцтва ў свайго чароўнага месяца. Белавежская пушча захоўвае шмат розных таямніц і сакрэтаў, таму атмасфера ў лясным царстве асаблівая. Тут можна атрымаць падарунак, а можна і зрабіць падарунак. Тады яго размесцяць у Скарбніцы, і кожны зможа ўбачыць, якія прыгожыя рэчы робяць сваімі рукамі госці ў падарунак навагодняму чараўніку, якія незвычайныя прывозяць званочкі — Дзядуля сабраў іх цэлую калекцыю.
Госці з задавальненнем наведваюць усе цікавосткі рэзідэнцыі, а таксама частуюцца чаем на травах, блінамі і рознай смакатой.
Настаўніца з Брэста Вольга Бабко прыехала з дзецьмі:
— Дзеці у захапленні, яны чакалі сустрэчы з Дзедам Марозам і Снягуркай, мы ехалі за навагоднім настроем, і мы яго атрымалі, а яшчэ — зарад весялосці і бадзёрасці.
Фота з архіва, носяць ілюстрацыйны характар
Каментары
Снегурочка в бело-голубо-желтом
где зеленый? зеленый-то где?
и как идеологи это все пропустили?