15 кастрычніка ў галерэі касцёла Св. Сымона і Св. Алены адкрылася фотавыстава Валерыя Вядрэнкі «Апосталы Гервят».
15 кастрычніка ў галерэі касцёла Св. Сымона і Св. Алены адкрылася фотавыстава Валерыя Вядрэнкі «Апосталы Гервят».
На выставе прадстаўлены плён двухгадовай працы з матэрыялам фатаграфавання касцёла Св. Троіцы у в. Гервяты Астравецкага раёна. Экспазіцыя складаецца з дзвюх частак. У першай аўтар знаёміць гледача з мясцовасцю, касцёлам і яго інтэр’ерам. Другая частка выставы прадстаўляе фотапластычную кампазіцыю на тэму вобразаў Евангелля.
На адным з фотаздымкаў — снег падае з даху касцёла. За маёй спінай два маладыя чалавекі горача абмяркоўвалі гэтую працу. «Не можа снег такімі роўнымі пластамі злятаць! Гэта фотамантаж», — казаў адзін. «Можа, хіба ты не бачыў, як снег з даху падае?!», — даказваў другі.
Насамрэч гэта не мантаж, як распавёў сам Валерый Вядрэнка. Аднойчы ён доўга стаяў на холадзе і чакаў моманту, калі снег паляціць з даху. І ўжо расчараваўся ды вырашыў сыходзіць. Але, зрабіўшы некалькі крокаў, павярнуўся зноў да касцёла. Падняў фотаапарат і зазняў доўгачаканы момант падзення снегу.
З узнікненнем лічбавых тэхналогій сп. Вядрэнка пачаў займацца мантажнымі фотаздымкамі. Але гэта не перашкаджае яму працаваць і ў галіне традыцыйнай фатаграфіі.
Выстава Валерыя Вядрэнкі арганізавана пры падтрымцы Польскага Інстытута ў Мінску. Прыемна было на адкрыцці чуць беларускую мову з вуснаў дырэктара гэтай установы Пятра Казакевіча.
Паглядзець на «Апосталаў Гервят» можна да 15 лістапада.
Цяпер чытаюць
Ананімы — гісторыі беларусаў, якім прыходзіцца шыфравацца, бо рэжым лічыць іх дзейнасць «крыміналам»10
Каментары