У Бялградзе адмянілі канцэрт «Ляпіса Трубяцкога», выканаўцам не далі сербскія візы
Канцэрт беларускага гурта «Ляпіс Трубяцкі», які павінен быў адбыцца ў Бялградзе ў Доме моладзі 12 лютага, адменены. Паведамленне пра гэта з'явілася на сайце Дома моладзі, піша Reform.by.
У паведамленні гаворыцца, што прычынай скасавання нібыта стала «кепскае самаадчуванне фронтмэна гурта».
Арганізатар канцэрта, ATF Booking, прапануе магчымасць вярнуць грошы за набыты білет або абмяняць яго на магчымасць наведаць іншыя мерапрыемствы, якія ён арганізуе.
Прарасійскі сайт RuSerbia.com, не хаваючы радасці, дзеліцца падрабязнасцямі адмены канцэрта. Менавіта гэты сайт заўважыў анонс мерапрыемства пры канцы мінулага года і ініцыяваў кампанію цкавання. Да яе падключыліся адэпты «рускага свету» ў Сербіі з некалькіх арганізацый.
«Асцярогі з нагоды правядзення канцэрта аказаліся марнымі: дзякуючы магутнаму грамадскаму рэзанансу, цвёрдай рэакцыі палітычных партый (сярод якіх, у прыватнасці, «Дзверы», Радыкальная партыя і «Сербскія правыя»), мерапрыемства было адмененае», — лічаць у рэдакцыі пракрамлёўскага праекта.
RuSerbia.com прыводзіць адказ арганізатараў канцэрта з нагоды адмены. У ім гаворыцца пра пагрозы, якія паступалі на адрас музыкаў і арганізатараў, а таксама пра тое, што ва ўдзельнікаў гурта ўзніклі праблемы з атрыманнем віз. Таксама пацвярджаецца дрэннае самаадчуванне Сяргея Міхалка:
«Сябры, мы са шкадаваннем вымушаныя паведаміць вам, што заўтрашні канцэрт гурта «Ляпіс Трубяцкі» адмяняецца па прычынах, незалежных ад арганізатараў і гурта. Мы не баяліся праводзіць канцэрт, нягледзячы на:
1) палітычны ціск;
2) гімн Майдана, за які Міхалка запісалі ў неанацысты;
3) хваробу артыста, у якога сёння высокая тэмпература (39);
4) паступленне пагроз жыццю і фізічнай расправы;
5) негатыўную прэсу і шэраг іншых фактараў, якія наўпрост ці ўскосна перашкаджалі правядзенню канцэрта. Нават мерч надрукавалі.
Але, на жаль, праблемы з візамі для артыстаў, частка з якіх з'яўляюцца неграмадзянамі і рэзідэнтамі Эстоніі (пашпарты чужынцаў або Aliens пашпарты) сталі непераадольнай перашкодай.
Мы так і не атрымалі адказу з консульства Сербіі ў Хельсінкі і прынялі рашэнне пра адмену канцэрту з вялікім болем».
У сербскіх пракрамлёўскіх пабліках з гэтай нагоды пануе радасць. Цяпер яны вядуць кампанію, каб канцэрты былі адмененыя і ў Чарнагорыі.
Цяпер чытаюць
«Мы не ведалі Сяргея Ціханоўскага да сённяшняй прэс-канферэнцыі»3
Каментары